O le asō (Aso Sa taimi Samoa) e amata aloaia ai i Samoa le Vaiaso o Tupulaga Talavou.
O se vaiaso faapitoa ua laga ai soo se mataupu e aafia ai tupulaga talavou o le atunuu. E amata i se sauniga lotu tele lenei faamoemoe ma o le a faatautaia i lenei vaiaso faaaliga o taleni ma tomai eseese o tupulaga talavou.
O le a faatautaia ni mafutaga faaleaoaoga mo tama ma teine talavou, ma o le a lagalaga i fonotaga ua valaaulia ai tupulaga talavou o afioaga uma i Samoa le tele o mataupu ua aafia ai tupulaga e pei o le tagofia o fualaau faasāina ma le ava malosi, o le mataupu o tamaitai ua maua i le maitaga a o aooga pea, mataupu e pei o le lē lava o galuega e faasafua i tupulaga talavou ua i‘u mai a latou aoga, ma le puipuia ai o tupulaga o Samoa mai le gasegase o le HIV/AIDS.
E lē gata la i faafitauli ma manaoga ina ia foia, ae o loo faapea foi ona ave le faatāua i tulaga lelei ma le maualuga ua ausia e tupulaga o Samoa.
O tomai eseese ua mafai ona ausia e fanau, o le tulai mai o tupulaga talavou e tautua aiga, nuu ma ekalesia.
O le sao o tupulaga i pisinisi o le a faia ai faaaliga o oloa ma tautua, faapea ai faiga faatauvaga ua ta‘ua o le Talavou, lea ua ave ai le faatāua i atina‘e ua fai faatasi e autalavou i totonu o Samoa.
O lea tauvaga e maua ai faailoga tupe ma e mafai ona faaulu atu i atina‘e e maufaailoga mai i faaaliga o lenei vaiaso i se tausinioga faapea a Malo o le Taupulega, lea foi ua tele autalavou ua maua mai ai faailoga ma tupe e taui ai.
O nisi o ia tauvaga na manumalo ai le Autalavou a Magiagi i Samoa ma Malo o le Taupulega i se pasi o loo fealuai pea i le taimi nei, ma le Hall tele a le autalavou na fausia i sailiga tupe lava a tupulaga o le nuu.
O isi atina‘e na maua faailoga o le CD a Tulaele, o le lafumoa mai i Solosolo ma galuega taulima na faapea foi ona tausinio ai nisi autalavou i Upolu lava ia.
E talafeauga lenei vaiaso ma le tulai mai foi o faafitauli i tupulaga ua vevesi ai Matautu i Apia ma o uiga nei o tupulaga talavou na ta‘ua e leoleo e tatau ona laga i faatalatalanoaga a tupulaga talavou i lenei tausaga.
O le mafutaga a le Tupulaga Talavou a le Ekalesia Faapotopotoga Kerisiano Samoa o le a faatautaia lea i le laumua o le Ekalesia i Malua, lea o le a faatautaia ai foi a‘oa‘oga mo Autalavou uma o Upolu ma Savaii.
O le a api ai Autalavou ma o le a faagasolo ai polokalame o Siva, Pesepesega, Aoga Tusi Paia ma isi polokalame ua faataatia e le Vaega o Autalavou a le Ekalesia.
O loo iai foi Mafutaga a le Ekalesia Metotisi i Samoa e aofia ai autalavou o le a faatautaia a latou polokalame i le Laumua o le Ekalesia i Faleula. O loo malaga mai foi Autalavou mai i Ausetalia mo lea mafutaga tele i le faaiuga o lenei tausaga.
O le faitau aofai o Samoa ua manino ai le faatuputupulaia pea o le numera o ana tupulaga talavou lea e tusa ma le 1/3 o le faitau aofai o Samoa ua ta‘ua o le Talavou.
O polokalame a le Malo ua mafai ai nei ona faatautaia lenei Vaiaso Faamanatu i tausaga uma ma o le faaiuga o lenei vaiaso o le a saili ai le Tausala ma le Manaia a Tupulaga Talavou mo le isi lua tausaga.
