O faamalositino o le siva o le zumba o se tasi lea o auala ua unai ai le faamanatuga o le vaiaso atoa lenei o le soifua maloloina. O le alii Minisita o le Soifua Maloloina, le Afioga Tuitama Dr Talalelei Tuitama, o le sui o le Soifua Maloloina o le Lalolagi ma isi sui o le malo, atoa ai le matagaluega o le soifua maloloina i Samoa nei, lea sa amata ai le sauniga e tatala aloaia ai lenei vaiaso tāua.
Ua tele gasegase ua aafia ai le atunuu, ma o gasegase lē pipisi lava e pei o le suka, toto maualuga, gasegase o le fatu, kanesa atoa ai le gugu, o nisi nei o gasegase ua toatele tagata o le atunuu ua aafia ai.
O le taumafaiga la o lenei vaiaso ina ia saili auala eseese e mafai ona toe fagufagu atu ai pea i tagata o Samoa e tāua tele galuega e faatino ina ia taofia ai le siisii o le numera o tagata Samoa ua aafia i nei vaega o le soifiua e tatau ona maloloina.
O le itula e 5-6 i afiafi uma lava o lenei vaiaso o le a faatautaia ai le siva lea o le zumba i luma maota o le malo i le Eleele fou.
O le tatalaga o lea faamoemoe na faapea ai foi ona tauaao atu ai ma ni togi o ni ipu (trophies) o vailaau e faamamā ai fale ma meataalo i aoga e fā o Samoa ua amanaia i le tumamā, lelei ona faamalosia le tulaga o iai le mamā ma le soifua maloloina o fale lē ta‘ua, potu aoga atoa ai taumafa ua faatau i fanau.
O nei aoga ua filifilia mo nei faailoga o le aoga laititi a Saleapaga ma le aoga tumaoti o le Samoa Primary School, ae o le motu tele i Salafai ua faapea ona tauaao atu ai faailoga o le soifua maloloina atoatoa i le aoga laititi a Pu‘apu‘a ma le aoga a Amoa.
Ua faafetaia e le Soifua maloloina taumafaiga a aoga uma e fā ina ia mautinoa le soifua mamā ma le maloloina o fanau e aooga ai i nei nofoaga.
O le Aso Faraile o le vaiaso lenei o le a faapea ona ‘afa aso uma ai galuega a le Malo ae faamalosia le agai uma atu o tagata faigaluega i luma maota o le Maota o le Malo i le Eleele fou auā le siva mulimuli e faaiu ai lenei vaiaso faapitoa, o le faamalosia o le soifua maloloina o le atunuu.
