O le afiafi o le Aso Toonai na tea na nei, sa faia ai i Magele se sauniga faapitoa, e faamanatuina ai le atoaga o le tasi tausaga o le faapaleina o le tamaitai lalelei ia Metotisi Komiti Faalavaau, e avea ai o le Tausala Samoa i Niu Sila.
O le afiafi matagofie auā na auai uma atu ona aiga o uo i latou uma sa lagolagoina malosi ma tapuaia faiva o le tamaitai Tausala Samoa.
Na amanaia ai foi i lena lava afiafi ma se taumafaiga na ausia e le uso laititi o le tamaitai Miss Samoa Niu Sila, lona uso o Saunoa Komiti Faalavaau, i lona ausia ai o le tulaga sili aoao i suega a Aoga Aso Sa a le vasega 10 o le Ekalesia Metotisi; o se tulaga o le a ia tauaveina seia oo ia Setema. O nei tamaitai talavou o ni alo faasino i le susuga ia Lupematasila Faalavaau ma le tausi ia Inosia Faalavaau.
O le aulotu Metotisi mai Onehunga sa nafa ma le tapenaina o lenei faamoemoe. O le lauga faamalosiau ma lapataiga faatamā na saunia ma laugaina e le Susuga Falo Vaomua ma le faletua ia Maria Vaomua.
Sa auai foi le tamaitai Faatonu o le Miss Samoa Niu Sila, le Susuga Teeva Matafai Leniu, o nisi foi o le komiti a le MSNZ ma nisi o tamaitai sa tauaveian foi le pale a le Miss Samoa Niu Sila i tausaga ua tea.
Sa faafiafia ai foi i lea po nisi o ausiva iloga i Niu Sila nei, Le Tatau Samoa ma le Samoa Vision, ae na matuā silamiō le auvalaaulia uma ma i latou sa auai ina ua pese foi ma faatetetete le siufofoga mataina o le alii pese lauiloa o Ben Makisi.
Momoli atu ai faamanuiaga ma le faamalo a le Samoa Times, i le Tausala Samoa Niu Sila, Metotisi Komiti Faalavaau a o tulai mai ai foi i le faatinoga o ona tofi o se tausala Samoa. Malo fai o le faiva!
