O le Aso Faraile talu ai na aofaga potopoto ai aiga uo ma taitai o Ekalesia ma le Malo o Samoa i Sini mo le faamanatuina o le tausaga muamua talu na faavae lenei Asosi ua iloga le tautua i le faafofoga ma le faitau a le atunuu i Ausetalia nei.
Na amata le sauniga i se talosaga na saunia e le Toeaina Faatonu Rev Peleti Toese Toailoa sa ia momoli ai le faafetai i le Tofa ma le faautaga e galulue faatasi leitio eseese ma tusitala i Sini nei ma sui mai Melepone ma Canberra.
“Ia manatua pea o afioga a le Atua na poloai ia nonofo fealofani ma tala‘i le talalelei i itu e fia o le lalolagi.” O Iesu Keriso le uluai tusitala muamua na tala‘i atu i tagata ma faaauauina e ono soo. Na faaiu le lauga a le faafeagaiga i faamanuiaga mo le Asosi e agai atu i le lumanai ma ana fuafuaga lea ua telē le sao i faaaliga a Ekalesia i Ausetalia nei ma Ekalesia malaga mai Samoa.
O mafutaga a afioaga e masii mai mo se sailiga o ni fesoasoani mo atinae i nuu ma alaalafaga. E lē gata foi i lea o Pisinisi e faailoa e lenei asosi i leitio ma nusipepa aemaise mafutaga a aoga ma aiga o loo faasalalau a latou faamoemoe i Ausetalia nei.
Na momoli le faafetai e le Afioga Leaupepe Matautu o le FM89.3, o le tamā matua o loo faatamā i ai le asosi. Sa faafetaia le afifio atu o Patele Paulino, Ps Moliuila Luatua aemaise le Taitaifono o le Fono Aoao Tofa Tavaga Teleiai Malagamalii S. Wilson ma le faletua ia Lagi.
Sa fai foi le faletua ia Peti Moaga le failautusi a le konesula ma sui o le Tofa Manogiamanu Fonoti Etuale Ioane ma le faletua ia Safanua o loo malaga i Samoa.
Na auai foi le Afioga Muagututi‘a Aumao Leao Akeripa Toalepaialii na malaga mai Samoa, e pei ona avea ma taitai iloga o le Asosi Taalo ma le Olimipeka a Samoa. O ia foi na avea ma Pule o le Malae o taaloga i le Apia Park lea na talimalo i taaloga faavaomalo.
E tele foi pine auro a Samoa i taaloga a le Pasefika ma le Malo Taupulega na ausia i lana puleaga ma o se tamalii ua tele lona sao i taaloga a Samoa.
Na saunoa le Peresetene o le Asosi, Afioga Galumalemana Fata Pati Masini o le FM99.9 Laumua o le Talalelei, na faafetaia le lagolago a le aufaigaluega tofi faapea sui o le Malo, faatoa auiliili ai tapenaga a le asosi talu na faavae mai le tausaga talu ai.
E aofia i lea sefululua masina le malaga mai o le Palemia o Samoa, Susuga Tuilaepa Sailele Malielegaoi i Sini nei, le aso fanau o le HRPP na faia i Sini ma Melepone faapea le tatalaina aloaia o le Konesula i Sini. E lē gata i lea o le tele o faamoemoe o Ekalesia ma nuu masii mai. E lē gata i lea o sao o sui tusitala ma leitio i galuega fesoasoani mo Samoa i taimi o mafatiaga.
O le afioga Patele Paulino na faamanuiaina le keke o le Aso fanau muamua ma vaaia ai sui uma o le asosi, le aofia mo le taimi muamua i le usuina o le pese o le aso fanau. O le sui ia Tupuola Viliamu Eli na avea ma Fofoga o le po ma le susuga i le alii pese ia Opi Toomalatai ma Taofia e galulue uma mo le FM98.5 le Fofoga Moomia na faafiafiaina le mamalu o le aofia i pesega malu ma le malie.
O le susuga ia Pepe Pula Epati o le Epati Funerals na lagolagoina lenei faamoemoe tele aemaise le Western Union lea na saunoa i ai lona sui ia Eseta Ale Faitua i le agaga fiafia o la latou kamupani e lagolago lenei Asosi.
Saunoa le failautusi, Leilua J. Uesele, “O le a alo atu nei le mafutaga e fausia se talosaga e mafai ona faagasolo ai polokalame atiae i ana polokalame i le gagana Samoa i leitio a sui i Sini nei faapea le FM91.1 mai Canberra lea e galue ai le tamaitai ia Lieta Sauiluma Duggan, faapea le Apple FM i Melepone a le afioga Taefu Alex Silao.”
Sa faailoa foi le lagolago a le Western Union i mafatiaga o tagatānuu i le atu Filipaina mai le afā matautia ia Haiyan. O le Tofa Tauaa Letoa mai le Muaimalae ma le laumua na tauaaoina fesili ma tali i lea po auā nai faailoga laiti mo le valaaulia.
Na ta‘ape fiafia le po ua faamalieina i le tausiga matagofie ma le musika o taleni lava a sui o le asosi.
