(Rev Faafetai & Mereitulagi Setefano)
O le aso 11 o Fepuari 2012 na faavae mai ma fofoa ai lenei ekalesia i le na o le 3 aiga ma le faifeau, ae o se agaga meemee auā ua faaopoopo matafale a le aulotu ma ua atoa nei le 11 e aofia ai ma le faifeau ma le agia, ma ua tupu ma ola le galuega, e viia ai pea le alofa o le Atua.
O le lupe faalele mai Matautu Lefaga ma Fasitootai le susuga ia Rev Faafetai Setefano ma le faletua ia Mereitulagi Setefano mai Gautavai o loo tausia le aulotu. O lea lava sauniga sa amataina ma tatalaina e lana auauna ia Rev Faafetai Setefano ma faagasolo ai polokalame o le aso e pei ona faataunuuina i le Aso Toonai, aso 16 o Fepuari 2013.
Sa auai le tausi matagaluega a le Ekalesia Metotisi i Browns Plains, le susuga ia Rev Fereti & Muaina Vaalepu faapea nisi faafeagaiga ma le susuga i le Tiakono Toeaina o le Matagaluega EFKS, le susuga ia Ofoia Lemamea ma le faletua.
O le failautusi lava o le Ekalesia ia Lupesoliai Molia Tavao sa fai ma fofoga o le faamoemoe. Na aao mafola uo ma aiga ma le auvalaaulia, tali atu ai foi le valaau faaaloalo o le aso faamanatu ma tauaaoina ai e le Ekalesia se seleni e $7,020.00.
E faaoo atu ai se agaga faafetai a le susuga i le Faafeaiga ma le ekalesia, e le gata o i latou sa auai ae o nisi na faaoo atu fesoasoani e ui sa lei maua le mafutaga.
O le tuatusi i Brisbane o loo iai lenei ekalesia, o le 81 City Road, Beenleigh. Ma e talia soo se tasi e fia afio ma talaaao atu e tapuai faatasi ma i latou.
