E pei ona masani ai le Ekalesia Katoliko, o le uluai Aso Sa o masina i tausaga uma i le mae‘a ai o le Aso Sa o le aso maliu, e faamanatu ai le sulufaga a Iesu le agaalofa i le lalolagi atoa.
Sa tuufaatasia ai Divine Mercy e 5 i totonu o Brisbane, ma faatautaia e le Divine Mercy a Darra, e pei ona auai Inala, Goodna, Woodridge ma Marsden.
O le Misasa sa taitaia lava e le afioga ia Patele Epati Tamati, sa faatāuaina e lana afioga le galue punoua‘i o le tagata lava ia, ae aua le faalagolago i galuega a isi. Na vaavaalua ma Father Caroll i le taitaiina o lea Misasa.
Sa fai sao uma lava Divine Mercy ia e 5 i le lagiina o viiga. O le taitai o le Divine Mercy a Darra o Malaeulu Aukuso (Safotu), taitai o le Divine Mercy a Inala, o le faletua ia Rosali Fernandez (Mulivai Safata), taitai o le Divine Mercy a Marsden, o le afioga ia Faimalotoa Ioane Pale (Safotu), taitai o le Divine Mercy a Goodna o Ioana Purcell (Lotofaga), ma le susuga ia Lofipo o loo faauluulu i ai le Divine Mercy a Woodridge.
Sa faafoeina le aso e le susuga ia Peni Auvaa (Samata & Lefaga), o ia lava o le sui o le Divine Mercy a Darra. Na auai foi le taitaifono a le Puleaga Katoliko Kuiniselani o Ili Taualai & faletua ia Sulia ma le toatele o le mamalu ma le paia o le matagaluega Katoliko. Sa faaiuina foi i le taumafataga tele, ona lulu aao ai lea ma faatofa.
