O fanau o anofale ia o se fale, o anofale foi ia o aiga ma o anofale foi ia o soo se faleaoga o loo a’otauina ai ina ia maua le poto, aua a lelei aiga ua maua nuu lelei, a maua nuu lelei ua maua malo lelei ma le Ekalesia lelei. Soo se fanau lava ua soifua mai ma lana aganuu ua mamanuina aemaise lana ekalesia, ua tuputupu a’e ma alu i le aoga ina ia a’oa’oina ma asamo ia maua le poto.
O le aso sa 21 Mati, sa tatala aloaia ai i se sauniga lotu tele i le St Pauls Trinity Church le faailogaina o le sefulu tausaga talu ona amata mai le Polyfest a kolisi maualuluga uma o aoga i le motu i sauté, lea sa aofaga potopoto ai i Kaliesetete mo aso e fa, mo le faatinoina o lea faamoemoe.
O lea sauniga lotu sa taitaia e le susuga i le faifeau Rev Lapana Faletolu ma Rev Robin Walsh, ma faaaogaina gagana Toga, Niue, Fiti, Niue ma Samoa ma e tusa ma le luasefulu aoga sa auai o latou sui aemaise na logo faatutuila le auvalaaulia a’o alo atu le alii o Efeso Collins, Iunivesite Aukilani MA( Hons) mo lana saunoaga faafetai ma le faamalosiau i alo ma fanau, aua o le sitepu lava lea e tasi sa ia la’aina muamua.
O le sauniga lea sa foaiina atu ai i sui taito’alua o tusipasi, o i latou ia ua filifilia mai kolisi taitasi o fanau aoga Pasefika ua maualuluga o latou togi e tusa ai ma suega faaiu o le NCEA 2009, ma ua tulai mai lea po e silia lava pasene o alo Samoa sa faamanuiaina, ma na tulai mai le faatupulaia o pasene o le itupa o alii ua ausia ni togi maualuluga i suega, ona o tausaga talu ai pei lava e sili pea tamaitai. I se ripoti mai le fetalaiga Lealiiee Tofilau Taleni, sa uluai amata mai le faamoemoe e faiaoga Pasefika, faamaopoopoina e le fetalaiga Fuetanoa Seinafo ( Ofisa o Aoga) i le tausaga 2000 faapea le lagolago a le asosi o faiaoga Pasefika, o le auga o aute ia faalauiloa ma faatauaina aganuu aemaise gagana a fanau Pasefika i totonu o aoga.
O le kolisi maualuga o Cathedral College o le uluai aoga lea sa amatamea i faafiafiaga Faa Pasefika i le 1994 & 1996, ae ina ua a’e se tofa i faiaoga Pasefika i le 2000 lea na amata ai loa i aoga e 13 ma faia loa faafiafiaga i le Convention Centre, ae o le taimi nei ua faatupulaia aoga maualuluga ua auai lea ua faia ai loa i le Christchurch town hall.
O polokalame o le faamoemoe,sa amata mai i le faatauaina o tulaga mo galuega (Specifically Career Expo ), o tauvaga lauga i gagana Toga, Fiti, Atu Kuki, Peretania ma Samoa faapea taleni faamusika, aemaise o se inugati faapitoa mo taitai ( prefects) ua filifilia mai aoga taitasi ( Leader’s breakfast) e faafetaia ai foi a latou galuega faataitai i totonu o kolisi aemaise o le atili faamalosia o ia agava’a ina ia faaauau pea mo le lumanai.
Na taualuga lenei faamoemoe ua leva na tuupoina i faafiafiaga faa Pasefika a aoga e 16, ma o se po felanulanuai i toniga aemaise le taga eseese o siva ma faataupati, o le opogi a matua ese le matagofie aemaise o le lalago faatasi i tofiga eseese ua galulue feoeoeai ai matua ma faiaoga aua le anofale o aiga ia manuia lo latou faamoemoe.
O faafiafiaga sa faia lea i le town hall ma sa faatumulia i tagata pe ova atu i le 2000, na tatalo amata le alii aoga mai Iapani, Iosua Moemalo, saunoa faafeiloai le susuga Memea Maaelopa (faufautua sinia) ona tatala aloaia lea i le saunoaga a le afioga i le pulenuu(mayor) o Kalaiesetete, Hon Bob Parker.
Na taua foi e Lealiiee ( taitaifono ), o le tausaga 2006 na amata ai ona faagaioi e tama fanau a le Pasefika o loo galulue I matagaluega eseese a le malo polokalame ole Polyfest, ma o le taimi nei ua i ai le komiti faafoe o le polyfest lea ua faaigoaina o le SPACPAC e afua mai i le igoa na faaigoaina ai le polakalame ole faatalanoaga mo galuega ( Career Expo).
Avea foi lenei avanoa e avatu ai le faamalo ma le faafetai a le tatou nusipepa i fanau aoga uma, aemaise o matua faapea foi faivaalofilima o faiaoga ua outou gapatia i le faamoemoe, “ Ua malie toa, ua malo tau “
