O taleni ua faa‘oaina ai le tagata o faamanuiaga mai le Atua o loo mafai ona faatuputupulaia pea ma o ni vaega faitaulia i le soifuaga e tautua ai tagata lautele aemaise le fefaasoaai o tomai ma silafia i tupulaga lalovaoa o loo fai a‘e.
Ua lauiloa le tautua a le Heilani Polynesian School of Arts i totonu o Kuiniselani aemaise Ausetalia auā ua tele ina malaga i isi atunuu e lē gata o valaaulia faapitoa ae faapea a latou lava malaga.
O le manulauti a le Heilani Polynesian School of Arts o le faamautu, faalauiloa ma faasoa atu tu ma aga faapolenisia i soo se tagata (mission – is to preserve, promote and share the Polynesian Culture to all people).
O tamaiti mai le 3 tausaga e oo atu i le tagata matua o loo iai i totonu o le faalapotopotoga a le Heilani, ua agavaa tele i latou uma i le siva ae lē gata i lea ua o se aiga e tasi i latou i le taleni siva.
O se faatasiga uigaese na matuai faatumulia ai le pitonuu o Logan i le po o le Aso Toonai aso 17 o Ianuari, lea sa faamanatuina ai le sefulu tausaga talu ona faavae mai i laufanua o Kuiniselani.
O le tautua poo le auaunaga ua faaigoaina i le “Heilani” o le amataga ma faaiuga o suafa o le susuga ia Heimana Tahiata o se alii Maori ma Tahiti faapea si ona faletua le tamaitai ia Lelani Lynn Tafua Tahiata (Hawaiian & Samoan). O nisi foi sa lauiloa tele i lenei taleni aemase le siva ma o se matu palapala sa faasoaina ma pasiina mai i o laua tuaa.
O loo latou galulue vaavaalua nei ma le susuga ia Fati Tagata (Samoa) ma le faletua ia Waiana Tagata (Maori & Cook Island). Sa maua ai foi se avanoa e fai sao ai le susuga ia Igelese ma se vaega o le kulupu a le Malaga (My Journey) lea foi e faagasolo ma faamoemoe e faia le latou faaaliga tele i le aso 21, 22, ma le 23 o Fepuari 2015.
Sa maua le fiafia o le toatele o tagata sa auai i le po o le Aso Toonai ona e le gata i le agavaa o tupulaga i le siva ae o le lava saunia o faafiafiaga ma le aulelei o aufaafiafia. E ova atu i le selau onosefulu i latou o i le Heilani Polynesian School of Arts.
