Faamanatu le ola toefuataina o pagota i Tafaigata

O le mu tinitini o le la i le aoauli o le Aso Lua – e lei aveesea ai le naunau ua vaaia i fofoga o alii ma tamaitai o le Falepuipui o Tafaigata, a o faatino tala o le Tusi Paia, i le fanau mai o le Faaola, Iesu Keriso. O talafatu ua faatatau a‘oa‘oga i le ola toe fotuai o le tagata ua agasala ma ua tuli faasalaga.

E eseese lava teuga, ese foi le matutua o tagata o loo faatino nei tala, o pese ma siva faaleagaga ua ogatotonu i ai a‘oa‘oga o le Ola Toefuataina o i latou ua tuli faasalaga faafalepuipui i le toese. E momomo foi le loto i le vaai atu i tamā matutua ua sinasina lauao a o loo sisiva ma faafiafia le anoano o aiga ma uo ua tumutumu atu i le taimi lava lenei o le tausaga e molimauina le lauga mai o i latou ua ta‘u pagota i le nofoaga lenei.

O se taimi puupuu lea e toe tomanatu ai le toatele ma atonu e toe tomanatu ai foi i latou ua taofia i le falepuipui i le uiga o le toe fanaufouina o le tagata ma le pa‘ū e oo i ai le tagata ona o le agasala ua faamaonia.

E ese lava le vaai i polokalame nei o le Toe Fuataina a Pagota o Tafaigata, ma atonu na o Samoa lava e vaai ai le ave o le faamamafa i feiloaiga nei e tatala ai faitotoa o le toese i soo se tasi e maua le avanoa e agai ai i Tafaigata mo le maimoaina o nei polokalame.

E pei lava o se asiasiga i se nuu ua iai alii ma tamaitai nei. Ae e lē aveesea lava vaaiga i tua atu o le malae o faatautaia ai nei polokalame i pa sima, pa puipui uamea ma potu pogisa ua taofia ai le toatele ua tumutumu ma ua taofia i Tafaigata.

O le galuega faatusitala e faigata tele ona talia vaaiga e faafeiloai mai, auā o le natura lava o le tusitala o le masalosalo, o le taumafai e faitau isi gaioiga ma suesue tua atu o soo se upu e lafo, tua atu o soo se pese ma soo se tala ua fai ai nei faaevagelia. Ae o le umi ona nofo ai ma vaavaai i ia polokalame, e tulai mai ai lava lagona, atonu ua salamō le toatele, atonu ua moni le mau o loo lauga mai e le toatele lenei e faatatau i faamagaloga.

E ui i lea, o le faatinoga o tala ma pese ma siva, e faigofie lava ona aumai ai ma le manatu, talosia ae ua ofi i finagalo o le toatele o pagota le tāua o lea aso e tasi ma le faatinoga o faafiafiaga ua folasia nei. Atonu ua moni ai le manatu e sui ma toe fotuai le agaga ma le mafaufau.

E silia ma le to‘a 200 alii ma tamaitai o loo taofia i le toese i Tafaigata. E vaevae foi nofoaga e taofia ai ma ua fai o ni nuu. E iai lava matai o lea potu sima ma lea potu sima. O i latou nei e taitaia lotu o afiafi. O i latou nei e laga ni atugaluga o iai o Pagota ia i latou ua avea ma leoleo i ia nofoaga. O i latou foi e taumafai e fai faataitaiga lelei ma faamalosia a latou foi tulafono i le nonofo ai i totonu o le falepuipui.

E faapea foi le falepuipui o tamaitai ma ua ese le vaai i lea nofoaga i le taimi lenei i fale fou ia ua faaopoopo ma galuega ua toe tau faaleleia ai nofoaga e taofia ai pagota ua tele tausaga o faitio ai i le matuā leaga lava ma le faatupu gasegase ai o nisi.

O le faaiuga o le vaiaso lenei e tatala aloaia ai le falesa fou lea ua mae‘a ona fausia i Tafaigata auā faigalotu a pagota. O le isi vaaiga ese o le toatele o tupulaga talavou ua taofia ma o solitulafono aupito taatele ua vaaia i lenei vaitaimi o le talepe fale ma le gaoi, o le faaaogā ma le totō faapea le faatau o mariuana ma le tele foi o sauaga matagā.

O sauaga lava na e tele ai ina liliu ese le toatele ma le latou lagolago e tau tuu se fesoasoani i le toe fuataina o soifua o le anoano i totonu o Tafaigata ona o solitulafono nei ua aafia ai fanau teine ma tina o aiga.

E ui i lea, mo le aso lea e tasi, e aveese ai pa puipui ua tuu eseese ai pagota ma tagata saoloto ae faamanatu faatasi a‘oa‘oga ua aumai e le Tusi Paia. O le aso foi lea e molimauina ai galuega taulima ua faia e pagota, o a latou togalaau ‘aina ma maumaga ma isi lava atina‘e ua mafai ona faatino i le taimi lea e tuli ai faasalaga o le toatele i le falepuipui.

O le polokalame lenei mo le toefuataina o soifua o pagota ua faaigoa ai foi le Malumalu lea e tatala i le faaiuga o lenei vaiaso ma le faamoemoe o le Matagaluega o Leoleo ma Falepuipui, ia avea lea foi laasaga tele i galuega i Tafaigata ma auala o le a laveaina ai nisi o soifua mai i lenei nofoaga pogisa.

“O le ola toefuataina o lona uiga o le faatuanai o le sese ua tulai mai, ae taulai i le lumanai ma le soifua faamaoni ma le mamā mai i solitulafono,” o se tasi lea o saunoaga timai ma le faamalosiau a le Minisita, le Afioga Sala Pinati i le mafutaga faaletausaga lenei a pagota i le toese i Tafaigata.