E tulaga ese mai foi le tautua a Aoga Faataitai a le Kids Count Educational Preschools i le aai o Weymouth, Takanini ma Marne Road i Papakura mai i le tele foi o Aoga Amata o loo autovaa atu i ai aemaise lava mo alo ma fanau a le Pasefika ma Maori.
O le vaiaso na tea atu nei na faagasolo ai le faataunuuina o ni pati faapitoa mo le fanau, ma na matuā valaaulia faapitoa ai lava le tamaloa o Santa mai le North Pole na te tufatufaina atu meaalofa mo le fanau ma mātua.
O aoga faataitai nei e tolu o ni pisinisi e patino i le tamaitai papalagi o Mary ma lona alii o Tonny McLeod peitai e faapitoa lava nei auaunaga mo aiga e lē lelei tele le tamaoaiga i le itu tau seleni.
E matuā maualalo lava i le matuā leai lava foi o se pili e totogiina e mātua pe afai e faaa‘e mai le tamaitiiti ua tolu ona tausaga poo le lua foi tausaga auā o loo iai auaunaga o loo mafai ona maua mai ai le fesoasoani mo le faatupeina o pili mo fanau.
O nei foi aoga faataitai e tofu lava ma vans tailua (van service) ina ia mafai ona pikiina mai le fanau ma toe momoliina i aiga e aunoa ma se totogi. O nei aoga faataitai e faaauau pea le auaunaga i le vaitau o le Kerisimasi se‘i vaganā ai aso malolo (public holidays).
O le faagasologa la o le polokalame o le Kerisimasi, na saunia ai lava e le susuga ia Tonny ma lona faletua ia Mary ni meaalofa mananaia ma le matagofie mo le fanau i aoga uma nei e tolu. Na faalogoina leo o le fiafia tele ma le faagaeetia o mātua ona o lenei polokalame auā sa toatele foi mātua na faafesiligia le tualaga i meaalofa a le fanau.
O le mea sili ona mataina o le vaaia o le laufofoga fiafia o le fanau auā o le tele o aiga o aoga nei, o le mea mautinoa lava e lē gafatia ona faatau e mātua ni meaalofa o le Kerisimasi ona o le tulaga i le tamaoaiga.
Faaalia le lagona fiafia o le susuga ia Tonny ma lona faletua e tusa ma le avanoa lelei ua oo atu ai sa la auaunaga ma le loto foai e faapitoa mo fanau i lenei tausaga ma ua maitauina ai le fai ai o se suiga i olaga o le fanau (make a difference in the life of a child) o le faamoemoe lea i le auaunaga a lenei foi ulugalii faipisinisi.
