Faamanatu le Iupeli Siliva auaunaga Sr Salome Ioane

O le ofoina o le ola e auauna ai mo le galuega a le Atua o se filifiliga tautele ma le maua gata, e saili i ai e pei o le sueina o le auro ma le penina tautele, e totofi ma le mataalia, e faalagolago i le musumusuga a le Agaga Paia.
O se tofiga tāua le auaunaga a le afioga i le tamaitaisa, Sister Salome Ioane e pei ona faamanatuina le Iupeli Siliva, 25 tausaga o tautua ai mo le Sisters of Mercy i totonu o Niu Sila ma Samoa. O Sr Salome Ioane, o loo avea nei ma faiaoga ma Chaplain o le Aoga maualuga a McAuley High School i Otahuhu. Peitai o lona olaga atoa i le amataina mai o lana galuega o se valaauina lea na tofia i ai o ia e le Atua e faaaogāina ai lona tagata mo le lumanai.
O lana moemitiga na amata mai lava i asiasiga i maota o tamaitai sa i le tausaga 1985, na ia uluai asia ai le Sister of Mercy i Leulumoega, na totō ai se lagona fia auai o le tamaitai taupousa i lea ituaiga valaauina.
Sa galue foi o ia mo tausaga e tele i le faletupe o Samoa i lea vaitau, the Bank of Western Samoa, peitai e lei pe ai le lamepa o loo mumū pea i le fia naunau e avea ma taupousa i se taimi o i luma.
O le 1988 na faauuina ai loa e avea ma tamaitaisa ma taunuu ai le moemitiga ma avea ai loa o ia o se tamaitai taupousa faiaoga i Paul VI College i Samoa mai le tausaga 1988-1990. Na maua le avanoa faasikolasipi mai le malo o Samoa, e faaauauina ai aoaoga ma faauu mai ai i le USP i Suva Fiji ma lona faailoga Degree ma le Postgraduate Diploma in Education i le tausaga 1991-1993. O le mae‘a o lona faauuga na toe foi ai Sr Salome i Samoa ma faaauau lana galuega faiaoga i Paul VI College aemaise o le tofiga fou ua tofia ai o ia e fai ma Sui Pule o le aoga mai le 1994-1997. O se tautua ua iloga i totonu o le Ekalesia Katoliko, aemaise le ituaigasa Sisters of Mercy, 25 tausaga o le auaunaga, o loo galue ai e oo mai lava i le taimi nei.
Mai le tausaga 2001-2005 na avea ai ma pule aoga o le aoga Paul VI College, seia toe faaauau aoaoga ma faauu mai ai i le Iunivesite Aukilani i le 2007-2008 ma lona faailoga maualuga Master in Education (Honours).
O le 2009 na amata galuega ai loa o se faiaoga ma Chaplain mo le aoga McAuley High School i Otahuhu seia oo mai lava i le taimi nei. O le faamanatuina o le iupeli siliva o le auaunaga a Sr Salome Ioane i le faaiuga o le vaiaso, na faatumulia i le mamalu o tamaitaisa o le ituaigasa Sisters of Mercy, o aiga, uo ma ē masani ma le auvalaaulia, na molimauina lea aso matagofie.
O se mitamitaga lea mo lona aiga, aemaise o se Samoa ua iloga lana tautua i lea ituaiga valaauina. O le faamoemoe sa faia i le hall a le aoga St. Marys College i Ponsoby.
Ua moni ai le upu masani i ituaiga aso faamanatu faapenei, e tasi lava le ola e mavae atu foi, a o au galuega e faia mo le finagalo o le Atua, e tumau lea. Congratulations to Sr Salome Ioane!