O le agaga fiafia ma le faagaeetia ia i latou ua lē toe atoatoa le malosi o le tino ma le mafaufau, ina ua toe aulia manuia ma ulimasao le savaliga umi mai tausaga ua tuanai, a ua toe faaopoopoina lenei foi tausaga i le folauga ma le taufetuliga, a o molimauina pea le alofa ma le agalelei o le Atua i le soifua ma le malosi.
O i latou o loo faaaogāina le nofoa faataavalevale, o nisi e po le vaai faatasi ai ma i latou e logonoa, aemaise o nisi e iai foi isi manaoga faapitoa, o i latou ia sa faapitoa i ai lea aso e pei ona sa faamanatuina.
O le Lui Ola, o se polokalame sa tuufaatasia, ma e auga ma faaautū tonu ia i latou e pei ona ta‘ua i luga.
O le sini ma le aano moni o le Lui Ola, o le molimauina lea o galuega atoa ai ma le ofoina poo le luiina pea o i latou e lē atoa le malosi o le tino, ina ia tauivi ma faaaogā avanoa e toe a‘oa‘oina ai mo le lumanai.
O se polokalame sa tauala mai se tasi o auaunaga faasoifua maloloina a le Vaka Tautua, soofaatasi ma le Matagaluega o le Soifua Maloloina a Niu Sila.
O ni lui ua maitauina le aogā ma le tāua tele, ona ua vaaia ai le tele o suiga i soifua o i latou o loo auga i ai le fuafuaga.
O nisi o i latou ua toe a‘oa‘oina ma ua faauuina foi o ni faailoga maualuluga, ma tusipasi aloaia i galuega ma auaunaga, a o le toatele foi ua mafai ona susulu i ai se isi malamalama fou i o latou soifua.
E lē gata i tomai ua toe a‘oa‘oina ai, ae ua mafai foi ona iai se faamoemoe i nisi o gaioiga sa lē mafai ona faia ona o le malosi ma afaina sa iai.
O le mea sili lea ona tāua i le taumafaiga a le Lui Ola, ona o le toe tatalaina o faitotoa mo nisi o amataga fou, aemaise lava i latou sa leai se faamoemoe, ma ua nonofo ai pea i faalogona o le tino, ma upu a tagata.
E tele ma anoanoai galuega e mafai ona faatino ma faaaogā i ai, poo le ā lava le ituaiga malosi ua maua, e iai pea le faamoemoe.
O le molimau ma le mau faamatalaga sa saunoa i ai le toatele o i latou e iai manaoga faapitoa. Ua avea foi lea o se molimau ola ma ua saga faatupulaia ma alualu ai pea i luma lea atina‘e ua leva e lei faia i ai se faiga.
O le ala foi lea ua fiafia ai le faalapotopotoga a le Vaka Tautua ma i latou e pulea, ina ia faaauau pea ona faia ni aso faamanatu mo le Lui Ola.
O le Aso Faraile na tea nei sa faataunuuina ai fuafuaga mo lenei tausaga i le nofoaga a le Malaeola i Magele. O i latou uma sa faapitoa i ai lea aso tāua, faatasi ai ma o latou aiga sa auai uma i lea aso.
E lē gata ia i latou ae sa toatele foi le mamalu o le atunuu sa auai ma molimauina lea faamoemoe.
O nisi o malo faaaloalogia sa auai, o le tamaitai Minisita o le Matagaluega o Tagata Pasefika (Ministry of Pacific Island Affairs) Georgina Te Heuheu.
O le afioga i le alii faipule o le itumalo o Magele, le Tofa Su‘a William Sio, ma o ia foi sa saunoa e fai ma tali lumafale o le afifio ai o malo ma le auvalaaulia.
O le sui mai le Matagaluega o le Soifua Maloloina, o le sui mai le ofisa o tagata Pasefika, faapea le faatonusili o le Vaka Tautua. O le fofoga o le aso o le afioga ia Tunumafono Ava Faamoe, o se tasi o tamalii o le atunuu, o ia foi e po lana silasila. O le tasi foi o sui faufautua o le Vaka Tautua ma le Lui Ola, ae o le sui foi mo tagata Otara i totonu o le Super City a Aukilani.
O le mae‘a o le polokalame faatulagaina i lea taeao, ona alo ai lea o le mamalu o i latou sa auai faatasi ai ma le au valaaulia i le fofoga taumafa sa saunia ma tapenaina lava e le ofisa o le Vaka Tautua i Aukilani.
