E leai se igoa Samoa ua ave i ai se‘i vaganā o i latou e maua i le down syndrome e valaau lava o fanau poo tagata matutua foi e iai manaoga faapitoa.
O le faaiuga o le vaiaso lea na faatautaia ai se sauniga faapitoa e manatua uma ai i latou i Samoa e iai lea manaoga faapitoa. O se gasegase lenei ua faapea ona aafia ai le fanau ae e ui e lē o toatele nisi i Samoa o loo maua ai, ae ua aofia le numera o i latou e maua i le down syndrome i le tusa ma le to‘a 4000 o tagata Samoa ua lesitala i le atunuu o i latou e iai manaoga faapitoa.
O le sauniga na faatautaia na saunoa ai le alii ofisa sili o le auaunaga faafomai ma tausi soifua i Samoa (National Health Service) le afioga Leota Laki Sio ma faapea mai, e ese le tāua o le vaai faalelei ma le lelei aoaoina o fanau ma soo se tagata matua lava e maua i le down syndrome, ma o i latou nei e mafai ona pei lava o latou soifua o tagata e lē o iai ni manaoga faapitoa pe a lelei aoaoga e ofo atu i lo latou tuputupu a‘e ai. O i latou nei e pei lava ona silafia e lē tau mate‘ia lava auā e tali tutusa uma o latou foliga ma ua tele aoga i Samoa ua talia fanau nei, ma o le Fia Malamalama lea e toatele fanau e aooga ai faapea ai foi le Loto Taumafai.
O le faalapotopotoga o le SENESE lea e nafa ma aoaoga o fanau e iai manaoga faapitoa, na faatautaia lenei aso tāua o se fiafia mo fanau o loo i lalo o polokalame fesoasoani tuma‘oti mo i latou e iai manaoga faapitoa, ma o le faalauiloa na faia ina ia mautinoa e malamalama le lautele o le atunuu o le down syndrome ua na o se suiga e tulai mai i le fanau mai ai o le alii ma le tamaitai ae lē o se manaoga faapitoa faapea e lē mafai ona faaleleia. O lea sauniga na auai atu ai fanau e iai manaoga faapitoa aemaise o o latou mātua ma faiaoga i faalapotopotoga e pei ona ta‘ua o loo vaaia ma aoaoina fanau nei.
O le faamoemoe i tausaga taitasi ina ia manatua e le atunuu e iai suiga lelei e mafai ona faatino e tagata o le atunuu e fesoasoani ai i le atina‘e o i latou e iai le down syndrome ma e pei lava o isi manaoga faapitoa, a lelei lava le tausiga ma le aoaoga, o iina foi e iloa ai le suiga o ia sui o le atunuu.
