“O lenei ia oofu outou i le alofa mutimutivale, ma le agalelei ma le loto maualalo ma le onosai, faapei o e ua filifilia e le Atua, o e ua paia ma ua alofaina”. O nisi ia o upu autū na tomatauina e le Afioga Patele Paulo Filoialii o le ekalesia Katoliko i Barbadeos, i le lotu faafetai o le faamanatuina o le atoaga o le 80 tausaga o le tamā matua o Pa‘u Piano Puni. Ua na o le Atua e malie ai le galala o le tagata, aua la ne‘i galo le faamanū ma le viiga o le Atua, ae ia sula mai le agaga o le tagata, ia sula i le agaga ma le faamaoni.
Na soifua mai le tofa ia Pa‘u Puni i le aso 20 Iuni 1930 i le afioaga o Samatau, o le afio lava lea i le paia o le Falefa o Usoalii, afio mai Fiame ma le gafa, afio mai Maupu o le Tuiaana, afio alo o tama a le Lagi, maliu mai le nofo a ituaiga ma le mamalu ia Leulumoega, ma o Pa‘u o le ulumatua i le toasefulu o le fanau (6 tama, 4 teine), o ia foi o le alii o aiga.
O le taulaga o le faafetai sa faapea ona vaavaalua ai Afioga Patele Paulo ma le Afioga Patele mai le itu palagi o loo tapuai ai le tamā matua, ma sa faataunuuina lenei faamoemoe i le Twiggers i Addington.
O se aso tuupoina sa faatumulia i le mamalu o le valaaulia i tupu ma e‘e o le atunuu, e lē gata i lea o le fono a matai Samoa i Kalaiesetete lea o loo faatamā ai le fetalaiga ia Pa‘u Puni.
E toatele le mamalu o le aiga potopoto na auai, aemaise alo ma fanau, o fanau a fanau malaga mai Ausetalia, Samoa, Aukilani ma soo se pitonuu o Niu Sila mo le molimauina o le aso sa lupe.
E faafetaia ai galuega lelei a lenei tamā o le poutu e malu ai le aiga. Na mae‘a le lotu faafetai ona alo atu lea i polokalame o le aso fiafia. O le fetalaiga ia Lavea Selelimalelei Gafa Puni, o le alo o le toeaina sa avea ma Fofoga o le aso, ma o se faatautaiga na faamalieina i le faafofoga tapuai e pei ona molimauina e le valaaulia.
E maeu foi le sagisagi mai o alo ma fanau i le tapenaina o le aso o si o latou tamā, na faailoa i le keke matagofie o le aso fanau, o lona fausaga o le faletele Samoa e ono ona pou, o le isi keke o le faleoo e ono ona pou, faatasi ai ma le isi keke aulelei faafasitepu i ona fogafale e lima ae tu ai luga le niu, ma sa matagofie le faatulagaina mai o nei fale ae gaosi uma i sukalati.
O le tau maitau atu i ai a le tusitala i le keke e pei e foliga mai, o le olaga tautua o le Samoa e amata mai i si faleoo e talatalanoa ai le toeaina, loomatua ma lana fanau, ia ma faasolo atu ai i le faletele e vevete ai upu a matai, ae pau le tulaga na maitauina o le tasi lava o le feula a le toeaina o Pa‘u ae pe le moli o lana keke, ia ma faapea ona patipatia ai le alofa o le Atua ua aulia nei tausaga e tele.
O le tamaitai o Nofo Puni sa fai ma sui o le fanau e fai le molimau ma ia ta‘ua ai foi aga malie a le toeaina e fiafia lava e koleni i vaveao aemaise le nofonofo i le telefoni i le aso atoa, e talatalanoa i ana paaga e faatopetope ai le taimi o le aso.
O le taumafataga tele o le aso sa faataunuuina lava i le faleaiga lauiloa lenei o Twiggers, ma o se aiga felanulanuai auā le fofoga taumafa i ona tulaga eseese. Ua titi manu lava manu, ua fata luga, fata lalo i lau faaaloalo.
Sa faapea foi ona faasolo le aufaafiafia o le aso, matagofie naua tapenaga o siva eseese, auā le faafiafiaina o le valaaulia aemaise le tamā fai aso fanau. Talu ai ona o le fetalaiga ia Pa‘u o loo faatamā i ai le Fono a Matai Samoa, sa tauaaoina ai le meaalofa mai lea faalapotopotoga faatasi ai ma le latou sausaunoaga, ia o laei lava o le aso fiafia ua aulia.
E tusa ai ma aso faapenei, na alo atu le mamalu o le aiga mo faaaloaloga maualuluga auā le afio i Patele aemaise le mamalu o le atunuu na auai, sa faafoeina lava e le tofa Lavea Puni, ma o le fetalaiga Iva Tafaoialii sa tali fuaitau mo le valaaulia ina ua tasi i ai le faatau ma le sivaloa. Na faaiuina le po fiafia i le tatalo faaiu na saunia e Afioga Patele, tatala le filialii ma ta‘ape fiafia le fuamanusina, ae faamuli i latou o ē fiafia e faaauau pea evaevaga o lea afiafi. Ma e avea ai lenei avanoa e faamanuia atu ai le nusipepa i le aso soifua o le tamā ia Pa‘u Puni ua aulia fiafia.
