O le Maota o le faiganuu i Burpengary i le Sunshine Coast sa faamanatuina ai le 70 tausaga o le tamā, le afioga ia Taito Gale Tafaioletagaloa Tai Gale, i le Aso Toonai aso 7 o Mati, 2015.
O le afioga ia Patele Epati Tamati sa ia taitaia le sauniga faafetai, sa ia molimauina foi le soifua tausaafia faatasi ma ana galuega lelei mo le atunuu ma faalapotopotoga a Samoa o loo auai ai, aemaise o lana tautua i le Ekalesia i ona vaega eseese, e pele pea ia te ia o loo galulue ma mafuta ai.
O le alii Faifeau o Lawrence Seiuli o se alo e faasino ia Taito sa ia molimauina le mafutaga ma lona tamā ma ia faaiuina le sauniga faafetai i le tatalo.
O le tofa ia Pisao sa fetalai e fai ma sui o le afioga ia Taito ma le aiga auā foi se agatonu o le auvalaaulia ma le atunuu, ma faafetaia le aufaigaluega a le Atua.
O le tofa ia Saleaumua sa tasi i ai le faatau a le atunuu ona fetalai loa lea auā e faigata foi le pule fetalai o loo opea i le maota.
Toatele tupu ma e‘e o le atunuu sa molimauina lea aso faaailogaina o le soifua o le tamā.
O le afioga ia Tauiliili Peseta Ata Malifa sa saunoa mulimuli e momoli ni alofaaga molipo o le auvalaaulia faatasi ma le faamanuiaga mo le afioga ia Taito, aemaise foi o le faafetai i lona soifua auauna i le atunuu ma le galuega a le Atua.
Sa faaiu lenei aso matagofie i le tatalo sa saunia e le afioga ia Patele, ona ta‘ape ai loa lea o le filialii ma le faafiafiaina.
