Ia ‘aua lava ne‘i galo mea silisili ua faia e le Atua o Malo, ma o Ia lava o le faapogai i le aulia manuia mai o le atoaga o le 60 tausaga o le soifua o le faletua Lusila Vili pei ona faailogaina i Aranui i le aso 28 Ianuari.
Sa auai ai nisi o auaiga mai Samoa, o uo malaga mai Polani ma atunuu mamao aemaise aiga i Kalaiesetete.
I le mae‘a ai o le taulaga faafetai ma patipatia le alofa laveai o le Atua, ona faagasolo lea o le polokalama sa faatautaia e le susuga Nimo Vili, o se aso fiafia ma lauiula ona ua tini le faamoemoe, sa felanulanuai le faatinoga o le polokalame ona sa auai malo faaaloalogia mai isi atunuu, matagofie le vaai ma le faalogo i le eseese o tu ma gagana. Na alo atu le valaaulia i le taumafataga tele na tapenaina maeaea e le mamalu o le aiga, soo se ituaiga kuka aemaise figota o le gataifale.
Na sosoo ma le faamanuiaina o le keke o le aso fanau, molimauina le lalelei o le tina e autu ai le aso, o Lusila Vili na soifua mai i ona tuaa Tauta Pilimai ma Kolotita Pilimai ( Letogo & Leauvaa), ma faaipoipo atu i le afioga Samuga Vili (Lotofaga), e toalua o la alo tama o loo latou mafuta i totonu o le aiga.
O se molimau a le tina o Lusila na ia faafetaia ai le tausiga a le Atua mo ia, o le faaaogāina o lona soifua e auauna ai i le community aemaise lana fanau ma le lotoifale, sa faaopoopo le afioga Samuga i le latou mafutaga fiafia i le aiga, e iai aso e taugalemu ai, e iai foi aso e le taugalemu ai. O le sini o le fatu aiga tausi ia taumafai e ola fiafia, molimauina le alofa ma foliga fiafia i totonu o le aiga ae maise o le auaunaga mo le AFFIRM, e ala i le ekalesia St James Catholic i tausaga e sefulu, fesoasoani mo le faaleleia o le soifua lautele o tagata Pasefika.
