E ui ina ua motu mai ma le taula, ae o le toto e Samoa, o le gagana o le Faa-Samoa, o le poto ua sapi ai na a‘oa‘oina i Samoa, e susue pea le faamalama ma to mānatu i Samoa pe a oo i aso faamanatu iloga o le atunuu, e pei foi ona iai le Aso Gafua, aso 9 Iuni 2014, lea na aofia potopoto ai le paia lasilasi o Samoa mai tulimanu e fia o Melepone, i le Town Hall i Box Hill, e patipatia ma faamanuia faatasi le atoaga o le 52 tausaga talu ona saoloto Samoa mai faigamalo faakolone.
Na leai se ofi o le malu i le tumu o le atunuu na auai. Na amata aloaia le Aso Tele i le tutulai faaaloalo o le aofia, ae molimoli mai tagavai o Ausetalia ma Samoa i le tagitagi o foafoa na iliina e sogaimiti, ona amataina ai lea o le sauniga lotu, na taitaia e le sui o la tatou pepa, Atapana Poe o le Ekalesia AOG.
Sa galulue faatasi ma nisi o le aufaigaluega mai Ekalesia eseese, le susuga i le faafeagaiga ia Kiliona Mafaufau o le Ekalesia Soofaatasi(Uniting Church), le taitai matagaluega o le EFKS le susuga i le Faifeau toeaina ia Aviti Etuale, le susuga i le faafeagaiga ia Sila Samani o le EFKS, ma le susuga i le faafeagaiga ia Faiumu Faletua‘i o le LMS Toe Fuataina.
O viiga o le Atua na fofogaina e le aufaipese a le EFKS mai Brimbank a le susuga ia Sila Samani ma le faletua. Na mae‘a le sauniga ona usuina lea o vii o fu‘a e le tamatai pese ia Tina Vaasili, amata ai loa le galuega a le fofoga o le aso le fetalaiga ia Sa‘u Osovale Brown, i le valaaulia o le taitaifono o le Fono Faufautua mo tagata Samoa i Vitoria le afioga ia Lemalu Muliagatele Faatau mo lana saunoaga faafeiloai.
Na sosoo ai ma malo faaaloalogia o le aso, na auai sui o le faigamalo faasetete a Vitoria faapea le sui o le itu agai atoa ma nisi o sui a faipule, aemaise foi o le saunoaga matagofie a le afioga ia Peseta John William Nickel, le Pule o Fefaatauaiga i Ausetalia a le Kamupani Vaalele a le Fiji Airways lea na malaga mai Sini.
Sosoo ai lea ma faafiafiaga na tapenaina e ausiva eseese e pei o le Sons of Samoa, Autalavou a le EFKS a Brimbank, Autalavou a le Katoliko mai le Sacred Heart i St Albans, Tama Tatau aemaise o le Nesian Pearl, ona alo ai lea i le taumafataga tele ma le felanulanuai na gapatia ai le Fono Faufautua mo tagata Samoa i Vitoria.
Na gona ma leai se toe pisa ina ua amata le se‘iina o faailoga o le Lūlū (Raffle) ona o le faailoga muamua o le Ticket e malaga fua ai le tagata e toatasi i Samoa ma toe foi mai, na faimeaalofa ai le Fiji Airways, atoa ai ma le nofo i le Apia Central Hotel mo po e fā ma le taavale e faaaogā mo aso e fitu mai le QSI Car Rental i Vaitele, faatasi ma le tele o isi faailoga na faimeaalofa ai le kamupani a le Digicel.
Uma lea vaega ona faaauau lea o faafiafiaga aemaise o saasaaga faa-Samoa a le tele o Kamupani aemaise o tupu ma tamalii o Samoa na faaalia le valevale alofa ma le lagolago e faamatagofie le Aso Tele.
Na faaiuina le Sisigafu‘a a Melepone i le pitolaau tauave a le faleupolu o tofiga, fofogaina faatasi le Lota Nuu, tatalo faaiu, ma ta‘ape ai ma le agaga faamanū, auā ua malie le papa i galagala i faaaloaloga a le Fono Faufautua mo tagata Samoa i Votoria.
Faafetai Samoa, Lau Fu‘a lea ua agiagia!
