Na matuā faatumulia le hall a le aoga matata eseese a le Polyethnic Institute of Studies i Otara i le mamalu o le pulega ma faiaoga aemaise o tamaiti aoga, i le faamanatuina o le aso soifua o le afioga ia Leota Taulevaa Mikaele Futi.
O le Aso Lulu, aso 12 o Aperila 2011 lea na faia ai lenei fiafia tele a le aoga e faamanatu ai le aso soifua o le afioga ia Leota T.M.Futi.
Ua fā nei tausaga o galue le tamā ia Leota Taulevaa Mikaele Futi i totonu o le laumua a le Polyethnic.
O se tasi lenei o aoga ua latou ausia le matatia o le auina mai o alo ma fanau mai si o tatou atunuu o Samoa e a‘otauina i totonu o Aotearoa nei. Sa taitai e le tamā ia Father Dr Rev Stanley Theron le sauniga, ma o ia foi o le Academic Dean.
Na saunoa le susuga a le alii pule ia Fotuitaamai Jacques Theron, ma ia molimauina ai le telē o le sao o le tamā ia Leota i totonu o le aoga, lea o loo galulue uma ai ma lona faletua ia Lemoe Futi, o ia o loo faauluulu i ai mataupu i le va i fafo ma totonu lava o le laumua.
Na matuā faaali le fiafia o le fanau aoga e ala ia latou meaalofa aemaise a latou fiafia na faatino ai lo latou agaga faagaeetia i galuega a le afioga ia Leota ma le faletua o lea ua manuia mai ai le toatele o tupulaga lalovaoa a si o tatou atunuu.
Na faaalia foi le agaga fiafia o le tina ia Lemoe ona o le tofa mamao a le susuga i le alii pule ma le mamalu o le laumua, ua latou faatinoina ai o latou alofaaga mo le tamā o le aiga e ala lea i le taumafataga na saunia uma e le aoga.
Na molimauina e le tatou sui o le nusipepa le matagofie o le aso fanau o le afioga ia Leota, ma maitauina ai le agaga fiafia o le tamā i le faamanatuina o lona aso fanau, aemaise le molimau i le matautia o le faatupulaia o le fuainumera o alo ma fanau ua autovaa mai ua lē gata i Samoa, ae o le Pasefika, le atu Asia, Filipaina aemaise o le toatele o i latou mai le atunuu o Saina.
E momoli atu ai foi le faamalo i le tautua a le tatou aoga le Polyethnic mai Otara, ma faamanuia atu ai i le atoaga o le iupeli siliva o le tamā ia Leota Taulevaa Mikaele Futi.
