Faamanatu le 25 Tausaga o le PIPC a North Shore

Na faafoi le viiga ma le faafetai i le Tamā o i le Lagi, a le Ekalesia PIPC i North Shore, ona o lona alofa ma le agalelei ua mafai ai ona aulia ma le manuia le 25 tausaga talu ona faavaeina mai lenei Ekalesia.
O le 1987 na faatuina ai lenei Ekalesia i Glenfield North Shore, ae o le 1988 na osi ai le feagaiga ma le Susuga ia Uiva Vagana ma le faletua ia Akenese.
Sa lē faigofie lenei faigamalaga ae peitai o talosaga molia pea na tali mai ai le Tamā o i le Lagi ma maua ai se malumalu tapuai o le Ekalesia i le 2006.
Ua malolo nei le Susuga ia Uiva Vagana ae ua tulai mai le Susuga ia Siitia Siitia ma le Faletua ia Tine e tauaveina le galuega i North Shore.
Na maualuga ma matagofie le faamoemoe o le Ekalesia ina ua auai nisi o faafeagaiga ma o latou faletua, le Susuga ia Matavai Alefaio ma le faletua ia Matautu.
O le susuga lava i le failautusi o le fofoga foi lea o le Ekalesia, Tofa Sa‘ula Paiaaua Tanimo sa saunoa i le tala o le amataina o le galuega, ae o le Aoga Aso Sa sa peseina le vii o le Ekalesia.
Saunoa le Tofa ia Sa‘ula Paiaaua Tanimo, e lē mafai ona faagaloina ē ua fai i lagi le folauga sa o latou asaina le gasu o le taeao mai le Afioga ia Tupuola Saufoi Suaniu le uluai failautusi o le Ekalesia, Faletua ia Asiasiga Aitui le uluai Teuoloa o le Ekalesia, aemaise ai le motusia o le mafutaga pele ma le Tina o le galuega Faletua ia Akenese Vagana.
Ua tupu ma ola le galuega pe a fatusatusa atu i le amataina mai i na o ni nai aiga toaitiiti lava. O nai toe Ulutaia o lenei ekalesia Afioga ia Tufuga Ario Aitui, Tamā malolo ia Uiva Vagana ma le Tina matua ia Vaivase Suaniu, o loo lagolago malosi i le Susuga ia Siitia ma le faletua ia Tine auā se lumanai manuia o le Ekalesia.
Ia manuia tele le 25 tausaga o North Shore ma ia manjuia le agai i luma o le galuega a le Atua.