Faamanatu le 21 tausaga o Taumaoe Tunumafono Iosefa Oti

E maualuga le agaga faagaeetia ma le faafetai e foi pea i le Atua le Tamā ona o Lana pule faasoifua e ala i aso e faaopoopoina pea. O le po o le Aso Faraile aso 5 o Mati na faamanatu ai le 21 tausaga o le tamaitai  o Taumaoe Tunumafono Iosefa ‘Oti.
O si ona tamā o Tunumafono Iosefa mai Sataoa & Sogi ma si ona tina ia Faafofola Kilipati Iosefa Oti mai Satapuala, Fasitoouta ma Faleasiu. Sa taitaia le sauniga faamanuia e le faafeagaiga EFKS a Petesa Fou le susuga ia Rev Peniamina Tuifaasisina.
O le tofa a Iliolemalae Apulu Asivao Kilipati sa fai ma fofoga o le po. Sa auai mai foi ona tauaiga mai Niu Sila, Amerika ma Hawaii, na  faapea foi ona avea o se aso sa  tauaofia ai aiga uma faapea uo ma ē masani i le molimauina o lea foi aso tāua o le olaga.
O le susuga i le a‘oa‘o fesoasoani ia Faumui Lavea na ia molimoli se agaga faafetai o le auvalaaulia ona o le taumafataga ma faaaloaloga matagofie.