Faamanatu le 21 tausaga o Sara Brown Leota

O le faamalosiau a le Faataoto 13:12, ‘O le faamoemoe ua tuai ona taunuu e faanoanoa ai le loto, a o le manao ua taunuu, o le laau o le ola lea.’
O le agaga faafetai ma le faaneetaga foi lea i le Atua, ina ua tini lau o le faamoemoe, ua aulia le 21 tausaga o le tamaitai o Sara Brown Leota o Falefa ma Clendon Manurewa. O aso ma tausaga o le olaga o lenei tamaitai o se faamanuiaga lea i nai ona mātua, le susuga i le Faafeagaiga ia Vaitagutu Peni ma Ana Leota.
E tele faafitauli ma taimi sa la tausia mai ai le oloa tāua mai le Atua, a o lea ua avea ma teine matua ma se tamaitai lalelei ua faamanuia i ai le Atua i tausaga e 21, aemaise o galuega ma aoaoga o loo feagai ai.
E lē o se folauga faigofie ae o le agalelei o le Atua ua aulia ai ma le manuia nei tausaga e tele. O se tamaitai lau fofoga tausaafia ma le usitai i mātua, faapea le agaalofa ma le agalelei i soo se tagata, o uiga na e mitamita fai a‘e ai loto ma agaga o nai ona mātua ma o le faamalieina foi lea o ona aiga ma le fai tama valevale alofa o mātua, ua sagai ane ai lava e matuā saunia se taumafataga tele e faamanatuina ai le 21 tausaga o Sara Brown Leota.
O le sauniga lotu sa taitaia lava e le tuaa o le tamaitai o Sara, le susuga i le Faafeagaiga ia Vaitagutu Peni Leota, a o le tatalo faamanuia o lona aso fanau, na saunia lea e le susuga i le Faafeagaiga ia Setefano Magele o le Ekalesia Metotisi Soofaatasi a Manurewa.
O se aso sa faatumulia i aiga, uo ma ē masani o le tamaitai o Sara. Sa faia le ‘aiga fiafia e faamanatu ai lenei aso faapitoa i Manukau. Ia manuia tele lou 21 tausaga Sara Brown Leota, ma ia faamanuia tele le Atua i laasaga o lou olaga mo le lumanai.