Faamanatu le 21 tausaga o Lagituatasi Silofau Autagavaia

Na atofaina le afiafi o le Aso Faraile e potopoto ai aiga ma uo i le Tiafau Hall a le Ekalesia EFKS Southwest Brisbane, ona o le molimauina o le 21 tausaga o le tamaitai o Theresa Lagituatasi Silofau Autagavaia.
Sa taitaia le sauniga faamanuia e lana faifeau toeaina, susuga  ia Rev Tauaaga Mataafa. E toatele nisi o faafeagaiga ma faletua sa auai aemaise le faifeau penisione manumalo ia Samuelu ma le faletua ia Tima Tu‘iai. O mātua o le tamaitai o Theresa, o lona tamā o Silofau Sauileone o Palauli & Fusi Safotulafai ma lona tina ia Fale Autagavaia mai Utulaelae Falealili.
Sa fai ma Fofoga o le aso le susuga ia Mata‘afa Samuelu Mata‘afa e faafeiloai le auvalaaulia ma faatautaia polokalame o le aso.
O saafiafiga o nai ona mātua, o Theresa o se tamaitai e tausaafia e tagata i le loto alofa, loto maualalo, usitai ma agamalu lea na afua ai lona tauaveina mai o le sili i le faitau Pi seia oo mai lava i le vasega fitu, o le vasega faaiu lea e gata ai aoga a le faifeau.
O ia foi o se uluai tamaitai o le talalelei i Kuiniselani (Gospel lady), na tulaga muamua foi i tauvaga taleni i le ekalesia aoao i Samoa. E tele ma soloi le taumafa sa tapenaina e le Uncle Sam’s Take Away, le tofa ia Poulava Sam ma Lorna Matautia.