O le Aso Tofi ua tuanai atu, 9 Me 2013 na faamanatuina ai le atoaga o le 21 tausaga o le tamaitai o Faith Shalom Elenoa Leota. O ia o se alo faasino i le Susuga a le faafeagaiga o Peter ma le faletua ia Vaonia Leota mai le Ekalesia Peace Chapel i Magele.
E pei ona masani ai, o aso faapenei e tauaofia uma ai aiga, uo ma ē masani e sapasapai ma faamanatuina
nei aso tāua.
O tu foi ma aga o aso faapenei, e masani ona tuuina atu le ki o le 21 tausaga, ae sa ese foi lagona o lea afiafi, ona e lei tauaaoina se ki mo le tamaitai o Faith. Peitai, na tuuina atu e lona tuaa se mama auro i si ona afafine e faamanatu ai le 21 tausaga o la laua tausiga faamaoni ia te ia, ae silisili ai le 21 tausaga o le alofa faapalepale o le Atua ia te ia e ui lava ina fefoifoia‘i le olaga.
Sa saunoa foi le faafeagaiga, e lē aogā ona tuuina atu se ki auā e uma tautau i le fale ma galo atu, ae sili le mama e vaai pea i ai ma faamanatu atu pea ia te ia, le faamaoni ma le agalelei o le Atua ua aulia mai ai nei tausaga e tele. O se afiafi matagofie tele, ma o tulaga masani lava o le laualo ma le Tamā o i le lagi e pei ona masani ai i faatasiga faapenei.
