Faafetai le Palemia i le sao tele o tamaitai Sa ma tamaitai tuai o Sagata Maria
O le fuaitau, “E lele le toloa ae ma‘au i le vai,” ua manino i le faatasiga lenei e faamanatu ai le atoaga o le 150 o tausaga talu ona amata faavae le Sosaiete o le SMSM poo tamaitai Sa o le Ituaiga o Sagata Maria i Samoa.
O ni tamaitai Sa se toalua mai i Farani na malaga mai i Samoa ma amata loa le Sosaiete lea ua iloga le malosi i Samoa i lenei vaitaimi.
O i laua ia o Sr. De la Mercy ma Sister Rose sa mafai ona o la faatū le aoga laitiiti i Savalalo a Sagata Maria, lea na faaauau atu i le Kolisi Maualuga i Vaimoso lona atinae. O le tausaga e 1864 na tulaueleele ai ia tamaitai Sa i Samoa nei.
O le faamanatuina o le tutoatasi o Samoa na amata ai lava ma le faamanatuga o le Aso Fanau o le SMSM e pei ona malaga mai ai le anoano o sosaiete o teine tuai o aoga nei a Sagata Maria i Savalalo faapea ai Vaimoso e fia molimauina lenei laasaga tele.
Ua atoa le senituri ma le ‘afa o le aoga a tamaitai ma ua tele se sao i le tulaga tauleleia o le tamaoaiga o Samoa ua iai le sao o lenei faalapotopotoga tele.
O sui o le asosi a teine tuai o Sagata Maria le SMOGA mai i setete eseese o Ausetalia, o totonu o Niu Sila, o Hawaii, Amerika Samoa ma Amerika na auai uma i lenei faamanatuga tāua e pei ona amata mai ai i se savali faaaloalo tele i Tiafau i le aso o le Tutoatasi.
Ae sa faatino foi se misasā paia i le malumalu fou o Maria Imakulata i Mulivai a o lei agai ai loa i ana polokalame faagasolo o le faamanatuga o le 150 o tausaga.
O se solo tele na molimauina i le Aso Faraile na tea nei lea na valaaulia uma ai tamaitai Sa o lea ituaiga atoa ai ma sui tuai o Sagata Maria latou te auai ai. Sa fai ai foi ma se tauvaga o taavale teuteuina lea na sola ma sui o le SMSM ma le SMOGA mai i Amerika Samoa.
O se koneseti mo faaaliga tausala na faatautaia i le po o le Aso Faraile lava lea ma na sosola ai tamaitai o Kalefonia i Amerika ma lea tausinioga i le sailiga o se manaia ma se tausala a le SMOGA.
E maeu foi le taupati ane o tamaitai o le aoga ma ua manino ai foi le maualuga o galuega ma aoaoga ua oo i ai tamaitai na aoaoina i ia aoga i lalo o taitaiga a tamaitai Sa o le ituaiga lea o le SMSM ma o lo latou sao na faaauau ona pepese ai tamaitai tuai poo sui o le SMOGA i nei faatasiga tāua o le Aso Fanau.
O le alii Palemia ma lana kapeneta na faafeiloai mai le taunuu atu o le savali tele ma le faaaliga o taavale teuteuina ma na ia faafetaia ai le sao o lenei ituaiga i le atinae o aoaoga i totonu o Samoa e ala i aoga ua aoao ai ona sui ae e faapea foi le unai malosi mo le tulai mai o tamaitai o Samoa i se isi foi laasaga e ala lava lea i le faamalosia o aoaoga.
Ua toatele sui tuai o le SMOGA ua tulai mai i tofi maualuluga o le atunuu e lē gata i totonu o ofisa a le Malo ae faapea foi i tamaitai faipisinisi ma e toatele lava na auai atu ma foai mo le aoga auā ana atinae faagasolo.
O le tasi o ia tamaitai tuai, o le Masiofo le afioga Filifilia Tamasese na ia alaluaina le keke o le Aso Fanau i le taunuuga o le savali. O le isi sui tuai o le afioga i le Masiofo ia Faamausili Leinafo Tuimalealiifano, o le faletua foi o le alii Palemia le susuga Gillian Malielegaoi o le isi foi sui tuai o lenei lava aoga.
O le uluai kapeteni o se fautasi, o le afioga Vaimasenuu Zita Martel le isi SMOGA sa molimauina faatasi ma le toatel
e o le aufaipisinisi o sui uma o le SMOGA ia na molimauina lenei faamanatuga tāua ua faia ona o le alolofa o tamaitai Sa mai Farani na filifili e agai mai i Samoa ma faatūina ai le latou sosaiete.
O le faafetai a le alii Palemia ona o le tautua a le Ituaiga Tala‘i a Maria le SMSM ona o le faafofoaina o le tele o soifua ia ua malosi le tulai mai i soo se atinae o le tamaoaiga o le atunuu.
