“Matua veveni o laua alafau, aulelei, mata ataata toe alafau apu mumu,” O finagalo faaaliia o alofa faitama o tina ma faletua i le masaga o Elijah ma Elisha, i le faamanatuina o lo la uluai aso fanau, i le Aso Toonai na tuanai atu, i le nofoaga o taumafataga a le faletalimalo i Water Garden.
Na faatumulia le malu i aiga o nai o la mātua, le susuga ia Filemu Raponi ma si ana manamea o Aovaa Raponi, na toatele foi uo ma paaga a le masaga na auai, e le gata i alo ma fanau a le aiga, a o nisi foi o alo o le Ekalesia, le mamalu o le valaaulia ma le paia o le aufaigaluega totofi a le Atua ma faletua.
O le fanau o le tofi mai le Atua, o le ala foi lea e ao ai lava ona sasaa uma le malosi o ma‘ua o mātua ina ia tino mai le finagalo o le Atua i o latou olaga.
A amata lelei foi, e faasolo manuia ai lava, ae ia o faatasi ma a ma tatalo ma le faatuatua, o se finagalo lea o le susuga ia Filemu mo si a la masaga.
Na mae‘a le faamanuiaga mo le masaga mai faafeagaiga, ona alalaga fiafia uma ai lea o siuleo o alo ma fanau na valaaulia i le usuina o le Happy Birthday, oka se leomalie o nai tamaiti, ona maau lea o aiga na lua mo le faaaloaloga mo le aufaigaluega, faaiuina ai le aso fanau manuia i le saunoaga faamanuia ma le faafetai a le faafeagaiga ia Atapana Ete o le Ekalesia a le Worship Center, le Ekalesia a le masaga ma si o latou aiga. Saunoa ai ma le tatalo faaiu, tatala ai le filialii ma le faamanū ma le manuia.
Happy Birthday Elijah and Elisha!
