Faamanatu le 1 tausaga Ekalesia Universal Pentecostal Ministry i Te Atatu South

E toaono lava aiga na faavaeina mai le lotu o le Universal Pentecostal Ministry i le itu i Saute o Te Atatu i Aukilani i Sisifo, ma sa faatinoina a latou sauniga i le maota o le komuniti i Te Atatu, ae o le aso 4 o Aukuso 2013 na faatūina ai loa lenei galuega, A o le Aso Sa la ua mavae, aso 10 o Aukuso na faailogaina ai loa le 1 le tausaga talu ona faatuina mai lenei lotu i le maota o le komuniti i Te Atatu lava. O lenei galuega o loo galulue ai le susuga i le faafeagaiga ia Teufilo Vaatiuola Lautolomisi ma le faletua ia Vinea Vaatiuola.

E tolu matagaluega o lenei pulega, sa auai uma ai lava i le faamanatuina o le aso fanau o le Ekalesia. O Watervie o loo galulue ai le faafeagaiga ia Sila Toloa ma le faletua ia Apolo; o Manukau o loo tausi matagaluega ai le faafeagaiga ia Feagaimaleata Fauoo ma le faletua ia Tala.
Sa lē tuua ai foi le fia mafuta atu o uo ma aiga o le aulotu e molimau faatasi le agalelei o le Atua i totonu o lenei galuega. O le faafeagaiga ia Teufilo Vaatiuola na faafeiloaia le mamalu o le auvalaaulia aemaise o le faletolu sa auai.

O le taitai o le sauniga o le susuga o le faafeagaiga mai Watervie ia Sila Tini Toloa ma o le sui taitai aoao foi lea o le ekalesia. O le tatalo o manaoga na saunia e le susuga i le faafeagaiga ia Lauaki.
O viiga o le Atua na peseina lava e le aufaipese a Te Atatu. O le laugaina o le upu a le Atua na fofogaina e le susuga i le faafeagaiga ia Lilomaiava Lepisi mai le ekalesia o le VOC i Henderson.

O le luitau ma le faamalosi a le auauna a le Atua, “O Peteru oe, ou te atiae lau Ekalesia i luga o lenei papa”, na sosoo ma le valaau mo sē o fia maua se tatalo o le faamalologa aemaise o manaoga faapitoa. Sa mataina foi le toe fafagu a tupulaga talavou mai ekalesia e tolu e ala ia latou aitema na faaatoatoa ai le molimau i le Aso Sa.
Na sosoo ma le toonai na tapenaina lava e le ekalesia. O le faletua ia Apolo Toloa na tatalo e faapaia le keke o le aso fanau ma o ia foi na feulaina moliga‘o. O le aao tusitusi o le ekalesia le susuga ia Iosefo Mani Sio sa fai ma fofoga o le aso, o ia foi sa nafa ma faaaloaloga e pei ona masani ai le aganuu a Samoa, ao le tofa ia Mailata sa fai ma fofoga o ekalesia ma le auvalaaulia sa auai e faafetaia foi le maau ma le milomilosia a le matagaluega i Te Atatu.

Ae na saunoa le susuga i le tausi matagaluega ia Teufilo Vaatiuola Lautolomisi, ua tupu le galuega ma ua vaaia ai foi le agalelei o le Atua, ua 12 nei aigalotu galulue o lana ekalesia faatasi ai ma isi aiga o loo lagolago i totonu o le galuega. E viia ai lava le Atua.
Se tasi o tuaa sinasina o le galuega ma le susuga i le faafeagaiga ia Teufilo Vaatiuola Lautolomisi

Le taimi a o faagasolo le sauniga

Pastor Teufilo Vaatiuola ma sui o lana Ekalesia