Ua leva ona tapena le faamanatuina o le 25 tausaga poo le Iupeli Siliva talu ona faavae mai le mafutaga a le Salesio itupa Samoa i Melepone. O le taulaga o le sauniga paia o le Misasa sa saunia e le taitai o le sauniga o Patele Paselio Tevaga (Leauvaa) sa malaga faapitoa mai Samoa ona o le faamoemoe.
O le afioga ia Patele Falaniko Leota (Solosolo) o le taitai o le mafutaga Katoliko Samoa i Melepone, sa vaavaalua i sauniga paia o le Misasa. O viiga o le Atua sa lagiina e le aufaipese a le Salesio Samoa i le pitonuu o Clifton Hill.
O le taitaipese o le tofa ia Fagāfua John Masei, o ia foi sa fai ma Fofoga o le aso. E tusa ma le 11 faifeau na faafailele mai i le mafutaga a le Salesio itupa Samoa i totonu o le 25 tausaga lea, o le mafuaga foi lea na amata faavae ai lea aulotu a le Salesio e fai ma aiga e mapu mai i ai tamaiti e omai e taumafai i le tofi ma feagai ma aoaoga.
E ui lava ina taumasuasua ma sasala le manogi o taumafa a le Uncle Sam malaga i Brisbane ae na ae na iai foi nai vaega na tau sasi i faigamea o lea aso ona ua lugā, lalō foi faatau ma le sivaloa paia ia Tumua ma Pule.
O le tala moni lava o le tele o faamoemoe e patino lava i ekalesia e tatau na faatalalelei peitai o le mea sa‘o o loo tupu pea lea tulaga ae ua ova ai ma le faavae lea tulaga. O le tulai mai o lea tulaga, na mafua ai ona tuuina sa‘o e le MC lea faaiuga o le aso i le afioga ia Patele auā sana saunoaga ma faaiu ai i se tatalo.
Na saunoa Patele, o le upu moni lava sa matuai lē fiafia le Atua, ana faapea e mafai ona saunoa mai le Atua semanu e faapea mai se o ia i fafo.
Na malaga mamao lava le susuga i le alii pule o le Uncle Sam’s Take Away le tofa ia Poulava Sam ma le tausi ia Lorna Matautia ona o le tapenaina o le fofoga taumafa o le faamoemoe a le Salesio itupa Samoa i Melepone ae o le susuga ia Uaita sa feagai ma le faafiafiana e ala i musika mālie.
Ofisa o le Mafutaga: Taitai/Peresetene – Leafa Sipiliano (Solosolo); Sui taitai/Fagafua – Ioane Masei (Nofoalii); Failautusi – Lavea (Samatau); Teutupe – Maryanne Seinafo (Faleapuna).
