Tusia: Rosa Tamala Fiu
Brisbane
O le faailogaina o le 50 tausaga o le susuga ia Niko Burgess sa faatāuaina ma mātele teuga a tagata i le faakaupoe, ona o ni vaega ia e fiafia tele i ai le tama fai asofanau.
E lē gata o pulou a o ofutino sa faaaogāina. Na vaaia le fiafia ma le sagisagi atu o le auvalaalia se‘i fai sina eva ma se‘i molimauina foi le faamanatuina o le 50 tausaga o le susuga ia Niko Burgess (soifua mai i le aso 29 Oketopa 1961).
O le mataina o lea faatasiga ona na mafai ona auai uma mai ona tuafāfine e toalua mai Samoa, Maila mai Faleasiu ma Tulaele, faapea Tali ma le susuga ia Enesa mai Neiafu, o lona uso ia Tua‘i Aufai Eliko mai Tulaele faapea le uso ia Kose, Eric ma Amy mai Sini.
O le susuga ia Niko ma le faletua ia Ruth ma le nofoaalo o Daniel ma Kirsty e lē gata e fai la latou pisinisi i Brisbane ae o loo iai foi le kamupani e rent ai taavale i Samoa, e mafai ona totogi uma atu iinei ae na o le malaga lava i Samoa e faaaogā.
Ua tele ina fesoasoani malosi le susuga ia Niko i le mamalu o le atunuu e malaga i Samoa e ala i taavale rent, lafoina o tupe ma tatala tusitupe i Samoa.
Momoli le agaga faafetai o le susuga ia Niko ma le faletua ma le aiga ona o le faatasi mai o ē na valaaulia ua maualuga ai le po ona o le tele o vaega sa faamatagofieina ai le faamoemoe ma maua ai le ‘ata ma le fiafia.
O le susuga foi ia Niko Burgess o se sui faasalalau a le Penina o Asuisui Switch 1197am.
Na auai foi le susuga ia Bishop Gisa, ma o se uo mamae a le susuga ia Steven Fa‘ifa‘i sa taitaia i se tatalo ona alo loa lea i le taumafataga.
Faamanuiaga ma alofaaga o le 50 tausaga o Niko Burgess e auina atu i paaga a le Runik Polynesian Town faapea aiga uma na malaga mai Samoa ma Sini, Penina o Asuisui, ae faasilisili alofaaga mai si au manamea o Ruth Burgess faapea le nofoaalo.
E toatolu si a la fanau o Daniel, Kristy ma Christopher o loo i Sini, faapea Pene ma Alefa ma le fanau i Brisbane.
