O le saunoaga i le Tala Faatatau Autū o le Tupe a Samoa 2011/2012 a le tasi o Faipule o le Faasaleleaga Numera 1 na saunoa ai le Afioga Gatoloaifaana Amataga Alesana Gidlow i le toe tagai o le Malo i se auala e vave ai ona sosola ese sui o le Palemene atoa ai tagata e galulue i ofisa o loo i Mulinuu pe a lulu se mafui‘e e ono tulai mai ai le sunami.
“E manatua le saunoaga a le Afioga i le Alii Palemia, lea na ia faapea mai ai a tuai loa ona sola ese vaai se niu lata ane e a‘e ai,” o se saunoaga lea a Gatoloaifaana Amataga. “Ae ou te ta‘u sa‘o atu lava i le mamalu o le fono, o a‘u e lē mafai ona ou pe‘a i se niu,” o le toe faaopoopo mai lea a le tamaitai faipule.
O le popolega lava o le tamaitai faipule ona o faataitaiga na faia i le Maota Fono i taimi ua tuanai na molimauina ai e tuai le taimi e o ese ai tagata pe a tulai mai se mafui‘e ma taumafai ai e agai i nofoaga maualuluga i totonu o le va lea e lulu ai se mafui‘e ma le taimi e tulai mai ai se sunami.
Na tulai le alii Palemia, le Susuga Tuilaepa Lupesoliai Sailele Malielegaoi ma ia faaalia ai, o le tamaitai faipule le isi e foliga mai e lei manino i gaioiga ua mae‘a ona faalauiloa i nei faataitaiga i le mea e tatau ona fai pe a tulai mai ni faalavelave ogaoga faapea.
“O la‘u faamatalaga lea na fai i le a‘e i le niu na faatatau ia i latou o loo nonofo i nuu a tai o le atu Aleipata auā e tele ai le laau maualuga,” o le saunoaga lea a Tuilaepa. Ae na ia faaalia o le faamuamua lava ia o le vave o le tamoe ma le agai i nofoaga maualuluga o lata ane.
“E sefulu minute lea e tele ina va ai se mafui‘e malosi ma le oo mai o le sunami, o lona uiga e fiu e lava le taimi lea e agai ese ai ma saili se nofoaga saogalemu e faamautu ai.
“E tusa ma le lua vaiaso talu ona tuanai le sunami na faalogoina ai le sailini i le taulaga o Apia ma na molimauina ai le agai uma o tagata ia latou taavale, e tau leai se isi na tamoe sa‘o i nofoaga maualuluga.
O le mea la na tupu ua feosofi uma i taavale ona agai loa lea i nofoaga maualuluga ae ua tulai mai ai le faafitauli ua feomai solo taavale i le taulaga ma ana tupu mai la se faalavelave o lona uiga e fano uma lava tagata ia na agai ia latou taavale.
Ae o lea e o ese mai i le fale e fogafale fitu semanu e saogalemu ai lava pe ana agai i luga o le maota o le Malo ma o le uiga lena o la‘u faamatalaga, e tatau lava ona manino uma tagata i le tāua o le iloa o le mea e fai pe a tulai mai nei faalavelave,” o se faamalamalamaga lea a le Taitai o le Malo, o ia foi o le Taitaifono o le Komiti e tali atu i Faalavelave Faafuasei faalenatura.
O le Fofoga o le Maota Fono i Tiafau, le Afioga Laaulialemalietoa Leuatea Polataivao Fosi na sosoo ai se isi foi ana fesoasoani e faatatau i lea mataupu mo i latou uma lava e galulue ma ua faamautu i le penisula i Mulinuu.
“Sa ma talanoa ma le Afioga i le Faamasino Sili ma na ia fautuaina ai le tumutumu o le Maota fou o Faamasinoga ona e maualuga ma o se tasi lea o nofoaga e mafai ona agai i ai sui mamalu o le Palemene pe a faapea ua tuai le alu ese ma Mulinuu.
O le finagalo o le Faamasino Sili e tatau ona iloa uma e tagata o loo galulue ai i le Ofisa o le Fono, Pulega ma le Ofisa o Faamasinoga, Ofisa o le Vaai Tau, le Televise o le Quality Broadcasting, le Leitio o le 2AP atoa ai ma isi aiga, aulotu ma le mamalu o le atunuu o loo ua nonofo ai i lea vaega o le taulaga o loo avanoa luga o le fale lea auā e maualuga.
O loo iai isi fale i le agai atu lea i Sogi ma Apia e pei o luga o le Maota o le Tupulaga a le EFKS, o loo sosoo atu ai ma le Fale ua faamautu ai le Ofisa o le Fono Soofaatasi a Ekalesia Kerisano a Samoa.
E lē gata i lea o loo iai foi le faletalimalo o le Millenium ma le Seana i autafa, o fale o loo maualuluga ma e malolosi.
E ui i lea e manatu le Alii Palemia e tatau ona vave ma faigofie le agai o le atunuu i isi nofoaga maualuluga. I lalo o le fuafuaga mo le tali atu i taimi o faalavelave faafuasei faale-Natura, o i latou o loo nonofo ma galulue ai i lea itu o le Penisula o Mulinuu, e tatau ona mafai ona agai i le Mauga o Vaea.
O le atugaluga tele lava o i latou e i lea nofoaga, o le taimi lea e 10 minute o loo tuli mai le sā‘oga lea mai i Mulinuu seia pā‘ia Savalalo auā e taufai sami itu uma e lua o lea eleele. O lea la ua vaavaai ai i nofoaga maualuluga ia o le Malo ma Ekalesia auā le laveaia o soifua.
O le faamautu ai o nofoaga nei i lea vaega maaleale o le siosiomaga, e latalata i le sami, na lāgā muamua foi ina ua mae‘a le sunami na afatia ai vaega o Samoa aemaise nofoaga lalata i le sami, i le lua tausaga talu ai.
O le popolega o le atunuu e pei ona faaalia i lea taimi, o le tulai mai o se mafui‘e ma se sunami ae muamua lava afaina le vaaitau o loo sau ai fesootaiga i suiga o le tau i le atunuu, agai mai i le leitio 2AP lea e soo uma le atunuu i ana faasalalauga e muamua lava foi afaina. Ona tuu ane lea i le televise, le Palemene ma le Ofisa o le Fono.
E lē gata i lea o totonu lava o le taulaga o loo iai le isi leitio poo le ualesi faasalalau o le Radio Polynesia lea e iai lona ofisa i Savalalo. O le tulaga lelei o lea leitio o loo iai lona lala i Mauga Fiamoe i Tiapapata.
O lona uiga e mafai ona tape le nofoaga i Savalalo ae faatino mai faasalalauga i lea nofoaga ma o loo iai fuafuaga e siitia le 2AP i Nuu ae e lei tino mai lea fuafuaga faataatia ma e foliga mai e matuā moomia lava le nofo sauni o tagata uma – ina ia aua ne‘i tulai mai ai ni puapuaga i le lē nofo sauni.
O le fautuaga foi lea mai i le Alii Palemia mo le tamaitai faipule aemaise soo se tasi o loo fesootai ma Mulinu e ala i galuega ma lotu. Faaalia e le tamaitai faipule o Gatoloaifaana o le faamamafa lava foi lea ua vaaia i Samoa i lenei vaitau, le tāua o le sauniuni.
