O le faaiuga o le vaiaso na amata ai galuega mo le faamanatuina o le vaiaso faapitoa o le Siosiomaga i Samoa.
O le polokalame ua faamautu mai e le Matagaluega o le Punaoa faalenatura ma le Siosiomaga, ua faatulaga ai le faamamāina o vaitafe i le talafatai o le taulaga.
O le vaitafe o le Vaisigano i le agai mai i Lelata seia oo i Vaisigano i autafa o le faletalimalo o Aggie Greys, o le vaitafe i Vaimoso agai i Fugalei, o le vaitafe i Tuanaimato agai i Vaitoloa, ma le vaitafe mai Lalovaea seia tau mai i Mulivai.
O le taumafaiga o le Aso Toonai atoa o le faamamā ae o le polokalame o le faasao ma isi vaega o le faamanatu ai o le vaiaso o le siosiomaga na amata ona faagasolo i le Aso Gafua (ananafi) i Poutasi i Falealili.
O le autū o lenei vaiaso o loo vaavaai ai i le galulue faatasi e tali atu ai i suiga ogaoga o le tau. “Atinae Gafataulima – Folauga i Peau ma Auma o Suiga” ma o le aso ananafi na faatautaia ai se sauniga tele i le afioaga o Poutasi i Falealili mo le amataga o le totōina o laau ma le faamalosia o le Faasao i lea itu o Falealili. O le asō (Aso Lua) o le a faapea ona aumai ai galuega faalauiloa ma fonotaga ina ia mafai ai ona unai galuega a le Matagaluega o le Punaoa faalenatura ma le Siosiomaga i se tasi o faagasologa o polokalame o lenei vaiaso tāua.
O le ogatotonu o le vaiaso e agai ai foi i le motu tele i Salafai lenei lava polokalame ma ua vaevaeina uma galuega faasao ina ia mafai ona aofia uma matagaluega a lea matagaluega e pei o atinae o togavao ma le suavai, o puipuiga mai i le soona puaina o kasa oona i le ea, o galuega o faasao o meaola ma laau aemaise o galuega faaauau i le faamamāina o vaitafe – ua aofia uma nei faasao ma puipuiga i galuega faalauiloa o lenei vaiaso.
O Vaitele i le nofoaga o loo iai se faasao a le Malo e faaiu ai lenei taumafaiga mo le totoga laau i le Aso Faraile.
