Ua filifilia se Komiti mo le tapenaina o lenei faamoemoe tāua o le Vaega Faaupufai
E tasi le vaiaso na malaga mai ai le alii Minisita lagolago o le Matagaluega o Leoleo, Falepuipui ma le Tineimu, le afioga ia Lafaitele Patrick Leiataua Lesa, e faatulaga ma faamautu le faamoemoe mo le faamanatuina i Brisbane, o le 33 tausaga talu ona faavae le vaega faaupufai o loo tulai mai le taitaiga o si o tatou malo i le taimi nei, le HRPP.
O lenei faamoemoe ua fuafuaina mo le masina o Setema o le tausaga lenei 2012. O le malaga mai o le fofoga o le vaega faaupufai mai Samoa, e tauaaoina mai ma lauina se tusi mai le afioga i le alii Palemia o si o tatou malo tutoatasi, e faafetaia ai le Mafutaga a le Tofā Mamao, ona o fale o le mafutaga ua ofoina mai e api ai le aumalaga faatasi ma le hall e faagaioi ai fuafuaga o le aso atoafaina.
Na faasalalauina i luga o alaleo se fonotaga e pei ona usuia i le afiafi o le Aso Tofi 19 o Ianuari. Na saunoa le afioga i le alii faipule i lea fonotaga, o lona oo mai, ina ia lauina se tusi faafetai, ma se‘i faaoo mai se finagalo o le alii palemia, ma e lē o faapito‘augafa i se mafutaga se tasi ae ia fusi mai Samoa uma i Kuiniselani e fiafia faatasi i lea aso.
Ua mae‘a la se fonotaga a le usoga ia Tumua ma Pule i Brisbane nei, i nisi o sui sa mafai ona auai atu i lea afiafi ma sa filifilia ai se Komiti o tapenaga mo le faamoemoe o le vaega faaupufai.
E lē o se taimi puupuu le 33 tausaga talu ona tu mai i le foe le vaega faaupufai a le HRPP e taitaia le malo o Samoa, ma ua a‘e ai se tofa i le taitai ma ana sui faipule e afea lenei Setete o Kuiniselani.
Sa faamanatu le 30 tausaga i Niu Sila ae ua tonu le faafitiga o ‘aleaga e afea laueleele o Brisbane, i lona 33 tausaga ma faaiu ai i Sini Niu Sa Uelese. E toatele le faigamalaga pe ā ma le 50 pe sili atu foi o le a fuafua e malaga mai faatasi ai ma nisi o aufaipisinisi, ma o le a faatupeina lava e latou lea faigamalaga. I le mae‘a ai o lea fonotaga talu ai nei, na filifilia ai nisi nei o tamalii ma failauga e avea ma sui o Tapenaga e pei ona malaga mai ai le Minisita mai Samoa: Taitaifono – Afioga ia Tauiliili Ita‘otemai Sugi Pepe Patu; Failautusi – Manusina Tuioti Setu Setu; Teutupe – Fotumale‘ula Saipele Manutai.
E to‘a 16 sui o le Komiti e aofia ai ma le laulau a fono ma ua amata faagasolo fuafuaga auā le sauni malaga mai o le afioga i le alii Palemia ia Tuilaepa Lupesoliai Neioti Fatialofa Sailele Malielegaoi ma ana Minisita e faamanatu lo latou 33 tausaga talu faavaeina la latou vaega faaupufai.
O le a usuia se isi fonotaga a le Komiti i Brisbane i se aso lata mai ma o loo tatala pea le avanoa i soo se tasi e fia pulupululima i lea faamoemoe, ina ia mafai ona tutufaatasi Samoa uma i Kuiniselani e opogi foi lea aso taupoina.
