‘Lo‘u agaga e, ia e faamanū atu ia Ieova…auā o le aso lenei ua Ia faia tatou te olioli ma fiafia ai…’ O nisi ia o upu faamanuia na saunoa faafetai i ai le susuga i le faafeagaiga ia Pastor Faauu Fuimaono, a o ia saunoa e ave lapalapa o malo i lo tatou Matai i le lagi, ona o Lona agalelei faaalia i le soifua tulu‘i ua Ia foaiina.
Na faatumulia le fale faafiafia o le Club Royalz i Manukau City i le Aso Toonai na tea nei i aiga ma uo mamae ma paaga sa faatasi ai mo le faamanatuina o le 50 tausaga o le soifua o le fetalaiga ia Maiava Maiu‘u Pulusi, o se tasi o ona alo le tamaitai ia Debbie Pulusi, faapea se tasi o ona tausoga le susuga ia Patrick Vili. O le fetalaiga ia Maiava o le alii pule foi lea o le auaunaga a se tasi o faaili ua iloga foi lona tulai mai i faafiafiaga ma musika faaneionapo, le Pineula Band.
O le Fofoga o le aso sa faafoeina le polokalame o le susuga ia Laei Soia Avauli, le tasi o alii pese a le Pineula Band, ae o le tofa ia Maiava Pulusi Pulusi sa fetalai e faafetaia le mamalu o Samoa na potopoto e molimauina le faamoemoe sa feagai ai.
O se tapenaga sa matuā vaaia le loifofoga maligi o le ‘alii fai asofanau’ ona e lē gata sa faamanatu faatasi o latou aso soifua (triple birthdays), ae sa tapena faalilolilo foi e le tausi ia Fetaui ma le nofoaalo, faatoa faateia lava le susuga ia Maiava i le ulufale mai i lea aso i le toatele o ana uo mamae ma tauaiga sa auai ai e lagolago i lona faamoemoe.
E matautia foi le felanulanuai o taumafataga a le Puataunofo Catering sa latou gaseseina taumafa o lea aso.
Ae lē gata i lea o se tasi o fiafiaga sili foi i le tofā ia Maiava, ona ua fetaui tonu foi lenei faamoemoe ma le vaitaimi ua faalauiloa ai le fatuga fou poo le lipine CD a la latou auaunaga a le Pineula Band, ua faaigoaina ‘Mativa i le Gagana’. E mafai ona maua kopi o lenei CD ma fatuga mālie o loo iai pe a fesootai le fetalaiga ia Maiava i le telefoni 021749751.
