Faamanatu EFKS le 29 ua maliliu i Pike River

$82,150 taulaga o le Faiga Me pulega Waitakere

E lē afaina pe Samoa pe palagi, aiga pe leai, pe lanu ma gagana faatasi pe leai foi, a o le sini ma le tāua o le faapupula atu o le Keriso o loo soifua i totonu o le soifuaga faakerisiano moni, o le finagalo lea o le Atua.

E ese foi lagona ma manatu na faalogoina a o tutulai ma fifilemu mo sina taimi auauna a le Atua, aemaise le aufaigaluega o le fale sefulu ma le pulega a Waitakere.

E lē gata i lea ae faapea ai le alii faipule o le itumalo o Te Atatu, Chris Carter, ma le mamalu o le faapotopotoga i ekalesia e sefulu ona o le faaalia o le agaga faaaloalo ma le faavauvau faatasi, e manatua ai i latou ua maumau soifua faapea o latou aiga i le faalavelave i Pike River.

O le lua sefulu minute muamua o le sauniga tuufaatasi mo le Faiga Me a le pulega a Waitakere i le Aso Sa, aso 28 Novema 2010, sa tuuina aloaia ma faapitoa lava e faamanatu ai soifua mo lea foi faalavelave matautia o loo ufitia ai Niu Sila atoa ma ona tagata.

O le susuga lava i le toeaina o le pulega, Rev Lucky Slade sa taitai i le sauniga o le Me, ae sa faaofi ai ma le taimi o le faamoemoe e pei ona ta‘ua. E toa 29 i latou o loo iai pea i le manava o le eleele e oo mai i le taimi nei, ma o loo ua iai foi le talitonuga ua maliliu uma i latou.

E 29 foi moliga‘o sa fai ma faailoga o le agaga faavauvau i le taimi o le sauniga. A o tolaulauina igoa e 29 atoa ma o latou tausaga, o le taimi foi lea sa gasolo ane ai alii ma tamaitai talavou o sui mai ekalesia taitasi e faaoo moliga‘o i luga o le laulau.

Sa taualuga i se pese faapitoa sa usuina e nisi foi o alii talavou, ma o se pese e faatatau lava i le faalavelave na tupu ma i latou ua talitonuina ua maliliu.

O se avanoa sa faafetaia e le sui faipule o le itumalo, Chris Carter le toeaina taitai ma faafeagaiga aemaise tagata lotu uma o le EFKS ma Samoa, ona o le amanaia ma le agaga faakerisiano moni na mafua ai lea sauniga faapitoa.

O le alii faipule sa fai foi ma sui o le malo o Niu Sila, e lē gata ina molimauina lea taimi faapitoa, ae sa ia momoliina foi se finagalo o le malo o Niu Sila.

O le susuga lava i le toeaina Rev Lucky Slade o le ta‘ita‘i o le sauniga, sa ia tali fuaitau ma toe faafetaia foi le alii faipule, ona o le faavanoa ane o lona taimi mo le faamoemoe o le pulega.

O le mae‘a ai o le sauniga faapitoa mo Pike River, ona faagasolo ai loa lea o le polokalame ona o le faamoemoe o lea aso o le Faiga Me a le pulega ma le fale sefulu.

O Te Atatu, Massey, Ranui, Glen Eden, New Lynn, Titirangi, Green Bay, Penisula o Petesa, Blockhouse Bay ma Peteleema Fou, o ekalesia ia e sefulu sa tuufaatasi ona o le faamoemoe o le ekalesia aoao i lana Faiga Me o le 2010.

Na tuua e le Samoa Times le sauniga e lei mae‘a le polokamalame faagasolo o le sauniga. A o se tuufaatasiga o le faiga taulaga sa tauaaoina i luga o le laulau i le taimi lava lea, ma e manatu o le aofaiga atoa foi lea o le taulaga mo le Me i lenei tausaga 2010, e tusa le ma le valu sefulu ma le lua afe, selau lima sefulu tala.

O le taulaga o le loto malie ma le alolofa i le Atua ma lana galuega, o le tasi lea o vaega o le soifua auauna ma le soifua galulue o le au faatuatua ma tagata lotu o le ekalesia, mai lava i lona taimi muamua ma le faavaeina mai o le EFKS, i Samoa.

Sa maitauina foi le felanulanuai o togiga a aufaipese mai ekalesia e sefulu i totonu o le malumalu o le Atua i lea afiafi. O le malumalu o le ekalesia i Massey, o loo ta‘ita‘i ai le susuga i le faafeagaiga Rev Alinuu Apisaloma ma le faletua, sa faataunuuina ai le Faiga Me ma le sauniga i le Aso Sa, 28 Novema 2010.