O le Matagaluega o Tina ma Tamaitai, Atinae o Nuu ma Afioaga ma Agafesootai, faatasi ai ma ana paaga (Matagaluega o Aoga, Taaloga ma Aganu’u, Matagaluega o le Soifua Maloloina, ma le Ofisa mo Soifua Manuia) sa taulamua ma taiulu i le faamanatuina o le Aso faapitoa Faavaomalo mo Tina ma Tamaitai, ma o se taumafaiga e fai ma sao o Samoa i le faamanatuina e le lalolagi atoa o le aso Faavaomalo mo Tina ma Tamaitai.
O lea faamoemoe, e faamanatuina i tausaga uma, ma o le sini autū la mo le faamanatuina o le aso Faavaomalo o Tina ma Tamaitai i le lalolagi mo lenei tausaga, ua faaautuina o “O Tina ma Tamaitai, e Lalagaina le Lumanai, e ala i Taitaiga Lelei i Aiga ma Afioaga, auā le Tafieseina o soo se Ituaiga Sauaga”, ma e tolu aso sa faatino ai lenei faamoemoe
(6 -8 Mati 2013)
I le aso 6 o Mati, sa faatinoina ai se faatalatalanoaga ua faaautu i Sauaga, ma ua filifilia ai Alii ma Tamaitai o le vasega 12 &13 mai le Kolisi o Anomaa mo lea faamoemoe, ma o le Matagaluega o Tina ma Tamaitai sa taulamua lea i le faatinoina o lenei faatalatalanoaga.
O le tāua o lea itu, ina ia faatalatalanoa ma malamalama lelei le fanau aoga 1) i tulaga tutusa o Alii ma Tamaitai, faapea a latou matafaioi e afua ai sauaga, 2) o ituaiga sauaga 3) o aafiaga o nei sauaga ae lē gata i lea, 4) o auala poo ni metotia e tali atu ai i sauaga e ala lea i manatu faaalia o le fanau aoga.
O le isi fuafuaga mo le faamanatuina o lea aso, ua faaautuina lea ‘O Taitaiga Lelei i Aiga & Afioaga faapea ai ma Faiga Filifiliga o se auala e foia ai sauaga e faasaga i Tina ma Tamaitai, ma sa fa’atinoina lava i le Ofisa o le Matagaluega i le aso 07 o Mati. O sui auai la o lenei faatalatalanoaga e aofia ai Sui Tama’ita’i o Nu’u ua mae’a filifilia fa’apea ai ma sui o Komiti a Tina o lo’o umia tofi taua ma agavaa ma ua tele so latou sao i totonu o Afioaga.
O lenei faatalatalanoaga na ta’ita’ia e le Minisita Lagolago o le Matagaluega o Tina ma Tamaitai, Atinae o Nuu, Afioaga ma Agafesootai, le Afioga ia Gatoloaifaana Amataga Alesana Gidlow o ia foi o se sui o le WinLA – o se fa’alapotopotoga o Tama’ita’i Taimua i totonu o le Malo, lea o lo’o Ta’ita’ifono ai le Afioga i le Minisita o Fa’amasinoga, le Afioga a Fiame Naomi Mataafa. O le faamoemoe o lea fa’atalatalanoaga ina ia faaalia ai o latou manatu ma finagalo i le mataupu aemaise ai ina ia fa’asoa mai a latou ta’ita’iga e tali atu ma foia ai sauaga faasaga i Tina ma Tama’ita’i i totonu o Nuu ma Afioaga.
Sa fa’apea fo’i ona tatala aloaia le ata fa’alea’oa’oga (documentary) i le aso 7 o Mati ua fa’aautuina “E Au le Inailau a Tina ma Tama’ita’i”. O lenei ata o lo’o fa’aalia ai tulaga tutusa o Ali’i ma Tama’ita’i fa’apea ai finagalo fa’aalia i aia tatau o Tina i totonu o le Aganu’u fa’apea itu fa’aleagaga. O lea ata sa tu’ufa’atasia e le Afioga ia Galumalemana Steve Percival, ma o lea fa’amoemoe sa fa’atinoina i le Iunivesite Aoao o Samoa.
O le isi fa’amoemoe taua o le polokalame, na aga’i tonu lea i Tina talavou (Teen Mums), ma o le taimi muamua lea ua fa’atinoina ai e le Matagaluega se polokalame fa’apea e patino lava mo Tina talavou. O le sini autu, ina ia unaia ma siitia le faamautuina o tomai ma agavaa i polokalame faalauiloa ma aoaoga e tali atu ai ma tetee atu i uiga faailoga tagata atoa ai
ma sauaga.
E faafetaia ai e le Matagaluega o Tina ma Tamaitai ana paaga e pei o le Matagaluega o Aoga, Taaloga ma Aganuu, Matagaluega o le Soifua Maloloina, Ofisa mo Aiga Manuia, faapea le UNFPA ma le UN Women, ona o le lagolagosua i le faafoeina o le polokalame mo le faamanatuina o le Aso Faapitoa Faavaomalo mo Tina ma Tamaitai, i lenei tausaga. Ia manuia tele le Aso Faapitoa Faavaomalo mo Tina
ma Tamaitai!
