Ua iloga ma mausali pea fuafuaga uma a le Miss Samoa NZ, e pei ona ausia ai le 21 lenei o tausaga o loo avea pea le Miss Samoa NZ, ua na o latou le tauvaga faitaulia mo le sailia o se tausala lalelei mai le mamalu o Samoa o loo alala i Niu Sila.
O lenei tausaga 2012, o se tausaga e tāua tele i le talafaasolopito o Samoa, auā ua atoa i ai le 50 tausaga talu ona tutoatasi Samoa e faatino e ia lava ana pulega.
Lea foi la ua faaautū ai le sailiga o se tamaitai lalelei o Samoa Niu Sila i lenei tausaga, i le faamanatuina o lea tausaga iloga, ua matuā talafeagai ona faamanatuina e soo se tagata Samoa. O le taulaiga lea o tapenaga a le tamaitai Faatonu o le Miss Samoa NZ, le susuga Te‘evā Matāfai, ina ia avea le tauvaga o lenei tausaga, o se faamanatuga e silisili ma tutasi mo tamaitai uma o Samoa.
Saunoa le tamaitai FAATONU, Te‘evā Matāfai: “O le tulaga matagofie na faamae‘a ai le faamanatuga lona 20 o lenei tauvaga i le tausaga talu ai, na matuā faagaeetia ai a‘u ina ia faalautele atili atu lenei polokalame, ina ia faaolaola pea la tatou gagana ma a tatou tu ma agaifanua, ina ia faamamaluina pea lo tatou faasinomaga ua tatou tiu ai, ma faamalosia atili alo tamaitai o Samoa i augatupulaga o loo fai mai. Manatua ua lē na o se tauvaga e pei ona masani ai; o se taumafaiga mo ni suiga tetele”.
E toaono tamaitai lalelei ua sauni atu nei mo le sailia o se tasi e faaauauina le pale ma tiute o le tamaitai poo le tausala Samoa, le Miss Samoa NZ 2012-2013.
O le tamaitai e manumalo, o le a agavaa e tausinio mo le sailia o se Miss World NZ poo le Miss World Samoa, ma avanoa ai mo le sailia o se Tamaitai Lalelei o le Lalolagi, le Miss World, lea e silia ma le 100 atunuu o le a tauva ai.
O le a agai atu foi le tamaitai e manumalo i le Miss Samoa NZ, mo sana malaga taamilo i lo tatou atunuu o Samoa faapea foi i Niu Sila nei, o se avanoa lelei e feiloai atu ma fetufa‘i ai ma le mamalu o le atunuu, ina ia atili faamalosia ai foi tagata o le komiuniti.
O le ute lenei poo le vaega o loo sili ona faatāua i lenei taumafaiga a le Miss Samoa NZ; ia taulai atu i le faamalosia ma le tautuaina o le mamalu o le atunuu.
Tamaitai tauva nei mo le Miss Samoa NZ 2012:
• Lette Lesleyann Su‘a Seiuli Saolotoga – Lagolagoina e le Ese Tatupu Funeral Directors
• Faalagilagi Chan Fualau Tuisalega Farani – Lagolagoina e le Five Star Motors
• Penina Maree Paeu – Lagolagoina e le Taulapapa Leata Su‘a Aoga Amata Trust
• Alana Tyrell – Lagolagoina e le Alignz Recruitment
• Hope Tualagi-Talataina – Lagolagoina e le Tuigamala Family Funerals
• June Nive Vaasilifiti-Ioelu – Lagolagoina e le Tuala Family
O le Aso Faraile, aso 7 o Setema 2012, o le a faia ai se polokalame i le Telstra Clear Pacific Events Centre, Lions Foundation Foyer (Arena Side), mo le muai faatalanoaina o tamaitai tauva, a o loma ai le tauvaga autū i le aso 22 o le masina lava o Setema 2012.
E amata le polokalame i le 6pm seia paia le 11pm i le afiafi. E pule le tagata i sana seleni e fai meaalofa ai mo lana ulufale i lea afiafi.
Ae mo le tauvaga autū i le Aso Toonai, aso 22 o Setema 2012, i le nofoaga o le Telstra Clear Pacific Events Centre, Genesis Theatre. E amata le polokalame i le 6pm seia oo i le 11pm i le afiafi. Ua faatauina nei pepa ulufale i le Ticket Direct: www.ticketdirect.co.nz.
O le Fofoga o lea afiafi o le susuga ia Brian Sagala, faatasi ai ma le lagolago a le faletua ia Taufau Gardenia Aukuso.
O se avanoa lelei o le a tatou maimoa ai foi ma faafofoga a o faafiafiaga siufofoga matagofie o le fa‘ili lauiloa a le FIVE STARS, tainane le tele o isi faafiafiaga ua faatulaga mo lena afiafi, ina ia avea o se afiafi e lē mafaagaloina.
Misiona a le Miss Samoa NZ: ‘Ia faamamaluina le matagofie o le Atua e ala atu i o tatou tamaitai lalelei o Samoa.’ (To celebrate God’s beauty through our beautiful Samoan women)
