E tusa ma le 2000 le aumaimoa i mea faapāpā matagofie felanulanuai i luga i le uafu i le taulaga i Ueligitone, i le afiafi o le Aso Lulu na tea nei.
O nei faaaliga fanapepa na faia lava e faamanatu ai le pine auro a le tamaitai o Valerie Adams, ina ua maua e ia le manumalo i le pine auro, lea na se‘ia mai i le tamaitai togi mamafa o Nadzeya Ostapchuks i Lonetona i le masina talu ai i taimi o taaloga o le Olimipeka.
Na maua i le suesuega o le inuina o fualaau faasāina e le tamaitai lea o Nadzeya, na ala ai ona ia maua le malosi e togi ai le polo mamafa ma maua ai le tulaga muamua.
Ua faamaonia le leai o se moni o lea manumalo, ma na faia loa le faaiuga a le Komiti o taaloga e ao loa ona foi le pine auro ia Valerie o lē na tulua lana togi i le tauvaga togi mamafa/mamao atoa. O lea la na matuā lagona ai le fiafia o le tamaitai o Valerie e tusa ai ma le silasila a le mamalu o le lalolagi i le televise i lana saunoaga matagofie ma faafetaia ai le atunuu atoa o Niu Sila e tusa o le lagolagoina o ia.
O se fiafiaga lea i o tatou tagata Pasefika e tauva i nei taaloga faaolimipeka, ona e lei ta‘ua lava se isi o latou ua faaaogāina fualaau e suia ai le malosi o le tino, ae tauivi lava i le malosi faamaoni e aunoa ma ni togafiti.
O Valerie Adams e tupuga mai i ni mātua Toga ua leva ona aumau i Niu Sila nei. E momoli atu ai le faamalo tele i lea alo o le Pasefika ae o se tamafanau foi a Niu Sila, i lona taalo ma le faamaoni ma maua ai nei tulaga manuia ma ua fiafia ai mātua ma le atunuu atoa o Aotearoa.
