Ona pau le eseesega ma le usua‘i a le toatele o le atunuu i le aso muamua lea o Iuni, ona o totonu lava o le afioaga o Asau lea na potopoto ai le pitonuu o Utuloa, ma amata loa sauniga o le sisiina o le tagavai o le atunuu.
O se vaaiga ese foi lenei ae ua masani ai lava Asau i tausaga taitasi.
O le mamao tele o le Malae o le Faautugatagi i Mulinuu lea na manatu ai le pitonuu e sili ai le faamanatu o le Tutoatasi i totonu lava o lea afioaga i le motu tele i Salafai.
O se aso ua mālōlō ai tagata uma ae agai ane loa e faatino le faamanatuga o lea aso.
O le soifua maloloina lava ma le lelei o le mānava na ave i ai le faamuamua i polokalame faagasolo o le Fu‘a i Asau. O se tamoega na taamilo i Asau na vaaia ai le toatele o le tupulaga talavou na mafai ona agai i ai.
O se faamuamua lea ua vaaia i le tele o nuu o Samoa ua faatautaia ai toleniga poo faamalositino pe taitasi pe tailua foi i le vaiaso, ma na aofia uma i le polokalame o le fu‘a i Asau i lenei tausaga.
Na iai lava foi Malu o le Malo e sisiina le tagavai o le saolotoga o Samoa ma na faia lea faaaloalo tele ina ua mae‘a le sauniga lotu e faafetaia ai le Atua i le toe aulia e Samoa atoa o se isi tausaga, lea ua atoa ai nei le 49 o tausaga talu ona tutoatasi Samoa mai i le vaaiga a atunuu tetele mai i fafo.
Na mae‘a le sauniga, le tulai faaaloalo ae sisi ane le fu‘a o Samoa ona taape loa lea i vaega eseese o le afioaga ae amata loa faafiafiaga, o taaloga aemaise o taumafataga e faamanatu ai lenei aso tāua.
E maeu foi le taumafaiga a lenei afioaga i lona pitonuu lea o Utuloa i sauniuniga mo lenei aso tāua i le talafaasolopito o Samoa.
E lē o mailoa foi pe o le a faamanatu ai lava i Asau le 50 tausaga o le tutoatasi o Samoa i le tausaga fou, pe o le a agai le afioaga aemaise le pitonuu o Utuloa i Apia mo lea faamoemoe.
O tausaga ua tuanai sa mafai ona faamanatu atoa ai e Asau lenei aso o le Fu‘a o Samoa ae o lea ua na o le pitonuu o Utuloa ua o latou faaauau le sauniga e faafetaia ai le Atua i le aulia mai e tagata o lea afioaga o se isi foi faamanatuga o le Tutoatasi ae lē gata i lea o le filemu o loo vaaia pea i totonu o Samoa i le atoa ai o le 49 o tausaga talu ona tulai mai Samoa o se Malo e pulea lava e ia ona ia upufai.
Na mae‘a tauvaga tausala, o tauvaga taumafa, o le tosoga maea ma isi polokalame e pei o faiga siva ma tauvaga pese, ona agai ane loa lea o le pitonuu ua faatautaia se laugatogi ma faafetaia ai le tupulaga i le lagolagoina o lenei fiafia tele e faamanatu ai le Tutoatasi o Samoa.
O le afioaga foi o Auala i Savaii lava na faatautaia foi le latou faamanatuga o le Fu‘a i totonu lava o le afioaga talu ai le mamao o Mulinuu i le motu o Upolu lea foi na tumutumu ai tagata i lenei tausaga auā le maimoaina o sauniga masani o le tutoatasi o Samoa.
