O le taeao manino ma le toto‘a i le sulugia ai e ave malolosi o le la o le nofoaga o iai le Maota Samoa i Kuiniselani, na sisiina a‘e ai le tagāvai o le saolotoga o Samoa e pei ona faamanatuina i le aso mālōlō, Aso Gafua, aso 14 o Iuni 2010, o le aso soifua foi lea o le Tupu Tamaitai o Elisapeta.
O le mafutaga a le Aiga Samoa Inc i le itu i Mātū sa taulamua i le faamoemoe i lenei tausaga. Sa amataina mai i le afiafi o le Aso Sa i se sauniga e pei ona faatumulia ai foi nisi o ekalesia aemaise le Mafutaga a le Soofaatasi, lea o loo faatautaia e susuga i Faafeagaiga, Sea o le Faasinoti faapea le afioga ia Patele ma nisi o tupu ma tamalii o le atunuu.
Sa tapenaina se taumafataga e ekalesia Aso Fitu o le Toe Afio Mai i Caboolture, Pine Rivers ma Deception Bay lea o loo tausia e le susuga i le Faafeagaiga ia Tusitina ma le faletua ia Lata Faiumu Ioane. Na muliga foi le tumu o Sisigafu‘a masani i Samoa, i le lolofi atu o le atunuu ina ia molimauina faafiafiaga ma vaega uma auā lea aso faapitoa.
O se faamoemoe lea na feiloai ai isi Samoa i Brisbane e taitasi i le tausaga ona mafuta ona o le mamao o isi nofoaga e pei ona silafia. Na mae‘a savali faaaloalo ona saunoa lea o le afioga ia Patele Epati Tamati e sii muamua mea i Matautu Sā, ona faagasolo lea o lauga faapitoa. O le saunoaga muamua o le susuga ia Anthony Beezley o le sui o Apoliki, sosoo ai ma Hon Dean Wells MP o le sui faasetete o Murrumba.
Sa logo faatutuila foi le auvalaaulia ma le aofia i se saunoaga mamalu a le Hai-Komesina o Samoa i Ausetalia, le afioga ia Lemalu Samau Tate Simi faapea le saunoaga a le Peresitene o le Aiga Samoa, le afioga ia Taulapapa Lemalu Roy Slade, e tusa ai ma le tapenaina mai o lenei faamoemoe sa fauao faupo i le alofa o le Atua. Na sisiina a‘e tagāvai e lua e Samataua Hanamenn Hunt ma Vaeluaga Pelite a o lagiina vii o nei fu‘a e alo ma fanau a‘oga a Deception Bay State School.
O i latou sa fai sao i faafiafiaga eseese, o le Ola Fou Church, Hula Hips, Ekalesia Katoliko Malu Lani Pasifika Dance Group, Caboolture EFKS Junior Youth, La o Samoa, Deception Bay State School, Faalavelave Frank Forst–Taekwondo Australia, Mafutaga a Samoa mo Taeao, UCFC Group, Miss Earth Samoa – Miss Varuna Curry, Miss Samoa Australia 2009/2010 Grace Schmidt Alai, Ekalesia Soofaatasi ma le ausiva a le Aiga Samoa.
Na saga‘i i le taumafataga a o faapea ona faafiafia le Charity Soo Choon, lea na manumalo i le Pasifika Idol Open Division, faapea le tofa ia Asuao Felise Mikaele, Faith Musu o lē na manumalo i le Pasifika Young Star Division, Nathaniel Key o lē na manumalo i le Pasifika Idol Original Song, faapea Mark Lowndes ma Geak Squad.
E 3 aso sa vevela ai le taaloga o taga polo (Golf)
Vaega A
Manumalo: Faleono Ah-You
Tulaga Lua: Tupu Aiono
Vaega B
Manumalo: Sila Fetu
Tulaga Lua: Fuimaono Aukuso Setu
Vaega C
Manumalo: Pati Tofilau
Tulaga Lua: Rev Elder Kerita Reupena
E toafā i latou na maufaailoga mai le Australia Link Golf Free Annual
Robert Andrews, Faleono Ah-You, Tupu Aiono, Iosefa Chong Nee
Manumalo Aoao i le Taamilosaga o le Sisigafu‘a
Gross & Nett: Robert Andrews
10 ‘au a alii sa tausinio i le voli polo i ‘au faavaomalo sa tausinio, ma o le sili lenei e oo atu i le tulaga 3 ma nisi sa lautogia
1st: Sparta Brothers (Mixed Brisbane/NZ players) – $1,000 & Trophy
2nd: Sideout from Melbourne – $400
3rd: CTR (Sydney/Brisbane Tongan mixed) – $150
Seti Sili ona Lelei: Nuuve‘a Fuamatu
Faatali Sili ona Lelei: Taleni Afakasi
Poloka Sili ona Lelei: Nathan Healey
Tu‘i Sili ona Lelei: Faaitete Su‘a
Alii Taalo o le Taamilosaga: Nathan Healey
9 ‘au a tamaitai sa tausinio i le voli polo ma o le sili lenei e oo atu i le tulaga 3 ma nisi sa lautogia
1st: Leauvaa/Sthside – $1,000 & Trophy
2nd: Miracle Dream (Sydney) – $400
3rd: Aiga Samoa – $150
Seti Sili ona Lelei: Theresa Malaitai
Faatali Sili ona Lelei: Tea Lealamanu‘a
Poloka Sili ona Lelei: Katrina Seufata
Tamaitai Taalo o le Taamilosaga: Theresa Malaitai
O fuafuaga uma o le Sisigafu‘a sa mafai ona faafofoga i ai i latou i maota ma laoa e ala i le auaunaga a le uluai leitio i Brisbane nei, le 4EB o loo tautua ai nisi o le atunuu faapea le Faatonu, i le susuga ia Savea Levale Lio ma le aufaigaluega.
Na manogi felanualanuai ai le tele o papakiu (bbq) ma taumafa faasamoa moni sa kukaina, ai o le ala lea o le tumutumu atu o le paka ona o le sasala o taumafa na faatosina ai le aumaimoa.
