Faamanatu Aso Sa o Tupulaga Ekalesia Metotisi i Kalaiesetete

O le alofa moni e aoai ma faatonu i le mea moni, o le autu lea o mafaufauga e tapasaina ai fanau tupulaga i lo latou Aso Sa faapitoa e pei ona faatauaina e le ekalesia aoao i le Aso Sa e lua o Fepuari i tausaga uma. Sa molimauina lenei aso tuupoina i totonu o le faletolu e pei o Addington o loo taitaia e Rev Ropeti Enoka, matagaluega i Hallswell o loo taitaia e Rev Poasa Leau faapea le aulotu i Kalaiesetete o loo taitaia e Rev Ale Palelei, ma laugatasia ai tapenaga a tupulaga e ala i pese ma faaevagelia.
I le sauniga la i le matagaluega a Kalaiesetete, sa ese foi tulaga ma tapenaga na alo atu i ai, ona ua vaevaeina nei i augatupulaga e fa, o le aumatutua (60 tausaga le soifua agai i luga), o le vaega feololo e aofia ai le aufai aiga ae o loo mata pepe pea foliga, o tupulaga o tama ma teine atoa ai ma le fanau laiti o le aoga Aso Sa lea.
E matagofie tele tapenaga a vaega uma e fa, ae na masofa pa o Ierusalema i nota soona alu a le aumatutua, aua e pule lava le tagata ia i lona leo, e ui i se naunau atu o le fuataimi malosi a le tina matua o Pule Fili Matua, ae maeu foi le matagofie o se sauniuniga ae faamalumalu ai le aumatutua.
O le augatupulaga matutua lea sa taitaia e susuga i faifeau malolo o Lasalo ma Elisara faatasi ma o la faletua, ae sasao ai le fuataimi a Pule Matua.
O le taualuga lava o le aso ia o fanau tupulaga lalovaoa a le ekalesia, e pei o nisi o le fanau sa tofia i le faitauina o le Tusi Paia, aemaise a latou faaevagelia na a‘oina lava e i latou ma pese sa taina e le tamaitai o Ofa-Ki-Moira Ale ma le alii o Fetu Falefa Fetu.
E faafetaia foi le lagolago a nai matua i le latou tapenaga manaia tele ma latou faataitaia ai i tupulaga le mea e ta‘u o le gaioi tusa pe lapoa le tino, aemaise le fanau laiti ma o latou leo pei ni agelu.
O le sauniga foi lea i totonu o le malumalu sa faauuina ai tofiga o lala o le ekalesia, e pei o le autalavou lea ua tulai mai ai Maelega Tuiono e avea ma Peresitene, o tofiga o le auso fealofani, aufaipese ma le aoga Aso Sa aemaise faiaoga Aso Sa ua ofoina atu lo latou soifua e auauna ai.
O lenei sauniga sa taitaia lava e le tausi matagaluega, Rev Ale Palelei lea na ia saunoa ai, o manu na o le feau ma le galuega, ma ia faalagolago i le Atua e aumai ai manatu lelei ma ia manuia foi galuega fou o lenei tausaga.
Na toe timai foi le faifeau i le au mautofi ina ia ‘aua le fia teine ma tama mamafa, a ia mamafa ia te i latou le galuega a le Atua.