E tupu olaola le tagata amiotonu e pei o le pama; e tupu tele e pei o le arasi i Lepanona (Salamo 2:12) O nisi nei o upu o le Afioga Paia a le Atua ua faatusaina i ai se toe ulutaia o le atunuu, le tamā matua ia Feesago Tinoa‘i ina ua laasia nei le 91 o tausaga o lona soifua.
O se tasi o tamā e fiafia tele e faafofoga i soo se leitio ma faitau le tatou nusipepa o le Samoa Times.
Talu ai ona e ao ona silafia e le tamā vaega uma o saafi ai tagata ia te ia ma lona soifua, a o maua la e ia le soifua ma le ola, o se mitamitaga sili lea ia te ia pe a faitau i nei tusitusiga. O Feesago e mai i alalafaga o Lufilufi, Toamua, Falelatai ma Solosolo. Na soifua mai i Lufilufi i le itumalo o Anoamaa i le tausaga e 1919 i le aso 1 Ianuari.
O ona mātua, o lona tamā o Fainuu Siale Feesago o Lufilufi a o lona tina o Tausili Tietie mai le alalafaga o Pata i Falelatai ma Solosolo i Anoamaa.
Na uluai faaipoipo atu ia Lauoi Lalau o Salesatele, e iai ona alo o Peneli ma Mafuli. Ona toe faaipoipo lea ia Faamuamua Tofaeono o Siumu ma Saoluafata i le tausaga e 1945 ma maua ai ona alo e to‘a 8. O lona soifuaga atoa o Lufilufi aemaise o lona fanua i Palisi i Apia. E suafa matai foi i Toamua ia LeAogamalie o le aiga Sa ‘Ulu. Na malaga ane i Ueligitone Niu Sila i le tausaga 1992 seia oo ina malaga mai ai ma faamautu i Logan Central i Kuiniselani. “E ui i Kuiniselani ae fai mai lava Feesago o Samoa; e lē mavae lona loto ma Samoa,” o se saunoaga lea a Tofaeono Misatauveve Joseph Hollywood.
“Ua fai mai le mavaega a lo‘u tamā ia te au ma lo‘u tuafafine, e toe ave lava ia e lagomau i lona fanua i Palisi pe a oo mai le valaau a le Atua,” o a Tofaeono Misatauveve Joseph Hollywood lea.
“O loo solo a Mona ti‘a o le tauti‘aga i lona soifua; o ona fofoga e manino lana faitau o lona mafaufau o loo mau manatu pea i le tele o taimi a o nisi aso, ua tau tevateva lana faasoa mai,” o a Tofaeono lea.
“Ae lē taumasina se tamalii ma le finagalo o le Atua; talosia a toe aulia atu e si o matou tama le na tausaga fou; pau le upu o le faafetai i Lona alofa ma Lona agalelei, ua tele nei aso mo le soifua o si o matou tamā; amuia matou o maua pea le mafutaga.” O nisi na o tusitusiga mai se tasi o le nofoaalo le afioga ia Tofaeono Misatauveve Joseph Hollywood.
Na mafuta faatasi alo o Feesago faapea fanau a fanau ma aiga i se mafutaga sili ona tāua i le uluai aso o le uluai masina o le 2011, i le faamanatuina o le 91 tausaga o le soifuaga o Feesago.
Na matagofie tapenaga a le nofoaalo ma aiga faapea ē masani na lolofi atu ma feiloai atu i le tamā matua.
O le afioga a Faamuamua Stone-Tolcher o le augafaapae a Tofaeono Misatauveve Joseph Hollywood, o loo feagai ma le vaaiga o si o latou tamā.
Manuia tele lou aso soifua Feesago! Ia saga foai pea e le Atua nisi tausaga se tele i lou soifua ma ia mamao gasegase mai ia te oe.
Alofaaga mai lou aiga faapea le nofoaalo.
