Mo i latou e i le ekalesia Katoliko, o le tasi lenei o Ituaiga o tamaitai sa ua umi tele le fesootaiga ma galuega faalelotu ma faaleaoaoga i totonu o Samoa. E iloa lelei lava i le ofu lanu moana ma le veli o loo o latou faaaogā i o latou ao.
O lenei vaitau ua faataga lava le galulue o nei tamaitai e aunoa ma veli ae e lē mafai ona suia le lanu o le laei ma ua tele ina fesootai ma atinae tau i aoaoga a tamaitai e pei o Sagata Maria ma isi aoga tamaitai a le Ekalesia Katoliko i Samoa.
O le vaiaso la lea na tea nei na manatua ai le toatele o tamaitai Samoa ma i latou mai i fafo na galulue i Samoa o lenei ituaiga. O le faamanatuina ai o le 80 tausaga o Taupou Sa Misionare Maria poo le SMSM, o se faamoemoe tāua mo taupou sa misionare uma i le lalolagi talu ona talia le ituaiga o le SMSM ma faapaiaina e le Tama Paia i Roma.
O se sauniga faapitoa e faamanatu ai le 80 tausaga o le SMSM i Samoa nei, sa faatautaia i le vaiaso na tea nei ma ua tuufaatasia ma le polokalame o le faamanatuina o le sulufaiga a aoga e lua o le Sagata Maria laiti i Savalalo faapea le aoga matutua i Vaimoso.
I se saunoaga autū na saunoa i ai le Afioga Sister Sosefina Stowers, o le pule aoga foi lea o le Kolisi o Sagata Maria i Vaimoso, ma ia ta‘ua ai auala o loo unaia e le ituaiga o le SMSM mo le agai i luma o fanau ma alo o le atunuu. “O le tele o aoga a le Ekalesia o loo i totonu o Samoa, sa amata ma faavae mai e le SMSM,” o se saunoaga lea a Sister Sosefina.
E ese mai le aoga a Don Bosco i aoga na amata mai e le SMSM i totonu o Samoa lava ia, ma o nisi o aoga na faavae mai e le SMSM e aofia ai le aoga ma nofoaga i Leone, Lotofaga, Falefa, Aleipata, Leauvaa, Leulumoega, Lealatele, Safotu, Safata ma isi sa faagasolo mai i tausaga ua mavae.
O le SMSM, o se ituaiga lea o taupou sa misionare mo le lalolagi atoa, e tofia e galulue i soo se atunuu e tofia ai ma e ofo fua ai le auaunaga mo galuega o loo manaomia ai.
O Sister Sosefina, sa faauu ma avea ma taposa i le tausaga e 1984 mai Heretaunga i Niu Sila ma o se tasi lea o sui o le SMSM o loo galue i Samoa nei.
E silia ma le 20 sui o le SMSM poo taupou sa misionare o loo galulue i totonu o Samoa amata mai i le tausaga e 1864 ese mai i le toatele o loo galulue i isi atunuu o le lalolagi.
O le faamanatuina o le sulufaga i tausaga taitasi, e manatua ai foi ma le taunuu mai o taupou sa i Samoa ma amata ai le aoga i Savalalo i tamaiti e to‘a 12, i le aso 18 Iuni 1865.
E lei faigofie le amata mai o le aoga i Savalalo ma na tapa lava le fesoasoani mai le tina paia o Maria ma e talitonu tamaitai sa na o latou taumafai mai le galuega, o loo latou faia le galuega a Maria.
E talitonu le SMSM, o le toatele o tuaa ua mavae ma o loo galulue pea mo le atunuu i le taimi nei, sa aoaoina i le galuega alofa a nei foi tamaitai ma o le fiafiaga lea i lo latou ituaiga, ona o se sao tāua mo le atinaega o le atunuu.
O le faamanatuina o le aso o le sulufaga i tausaga taitasi, o se faamoemoe tāua lea e masani ai aoga e lua o le Sagata Maria i Savalalo ma le Sagata Maria i Vaimoso.
O se aso o talosaga atoa ai ma faafiafiaga na molimauina i le faamanatu ai o nei aso tāua e lua i le tala faasolopito o galuega a tamaitai sa i Samoa aemaise foi o galuega a kolisi e lua ua malosi pea le fesootaiga ma le SMSM. Sagata Maria i Savalalo ma Sagata Maria i Vaimoso.
E ese mai i lea itu o aoaoga, o loo ua faatautaia foi e nei tamaitai aoaoga o mataupu e unaia i tamaitai e pei o le suisui atoa ai le gasesega o taumafa ma o loo valaaulia ai soo se tasi e fia auai ai i ia aoaoga ua feagai ma nei tamaitai.
