Faamanatu 50 tausaga, susuga Faafeagaiga ia Solomona Vaofusi

O le Aso Sa na tuanai atu, aso 12 o Aukuso, na aofia potopoto ai lala e 5 o le matagaluega AOG Ekalesia Samoa i  Melepone, auā la latou sauniga tuufaatasi e faailogaina ai le 50 tausaga o le soifua o le faafeagaiga ia Solomona Vaofusi.

Na maualuga le viiga o le Tapaau o i le lagi ona o se sauniga matagofie ma le mamalu, ae na matagofie atili ona o le mamalu o le valaaulia na susū atu ma fai tapuaiga faatasi ai ma Ekalesia.

O le susuga i le faafeagaiga ia Tavita Anitipa na taitaia le sauniga, ae o le susuga i le faafeagaiga ia Tauiliili Tuaoi mai Niu Sila na fofogaina le faamanuiaga o le aso soifua, ona inumalie ai lea o le matagaluega ma Samoa na iai i le sauniga, i le upu folafola a le Atua na fofogaina e le susuga i le faafeagaiga ia Apouani Unasa, o le taitai foi lea o le matagaluega a Melepone.

Na mae‘a le sauniga ona alo ai lea i le taumafataga tele na saunia e le Ekalesia a le susuga a Solomona, ona alo ai lea o le Ekalesia i faaaloaloga masani a le atunuu mo le aufaigaluega, aemaise o Samoa na potopoto. O le tofa ia Ale Sapa na fai ma Fofoga o le mafutaga.

O se tasi o itu matagofie na maitauina, o meaalofa na tauaaoina mo le faafeagaiga ma lona aso soifua mai Ekalesia eseese, aemaise lava o lana Ekalesia faapelepeleina i Werribee. Na atili maualuga le viiga o le Atua ina ua ta‘ape le aofia ma le agaga o le faamanū ma le fiafia ona o faaaloaloga a Ekalesia, aemaise o faamanuiaga faaleagaga mai fofoga o le aufaigaluega totofi a le Atua.

Ia manuia tele le aso soifua o lau susuga a le Faafeagaiga. Faafualoa e le Atua lou soifua mo lana galuega, maua pea sou finagalo auā le lafu mamoe. Alofaaga mai le taitai o le matagaluega Apouani ma Olevia Unasa, ou uso faifeau ma faletua o le matagaluega, ae afe ma afe mai lau Ekalesia AOG i Werribee, aemaise le faletua ia Moana ma nai ou alo.