Na leai se manu e olo auā na liligo le fogatia ma sagisagi fiafia le Ekalesia Katoliko a Goodna ua faaigoaina o “Ioane le Papatiso”, i lo latou aso faapitoa na faamanatuina ai le 24 tausaga talu ona faavae mai le Ekalesia.
Na matuai logo mālie saunoaga a le afioga ia Patele Epati Tamati na faamalosi ai le aofia pe o le ā se tele o ni taumafa o tau tapena i ai, ae na faalaeiau le tamā o le puleaga e tapena muamua ia lava le agaga o le tagata ia. Na ia toe saunoa foi o le ala lea na faalauleleia ai e Ioane le papatiso ma teuteu ala i loto ma agaga a o lei maliu mai lē mulimuli mai e sili o ia ia te ia, o Iesu lea.
O le ta o le 10 i le taeao o le Aso Toonai na faataunuuina ai le Sulufaga a le Ekalesia, ma na faatumulia i isi ekalesia Katoliko ma le auvalaaulia. O le afioga ia Taituuga Ionatana Selave sa fai ma fofoga o le aso ma faafeiloaia le auvalaaulia.
O le tulafale ia Faalogo Falemua Tevaseu sa fai ma sui o ekalesia ma Divine Mercies uma e molimolia se agaga faafetai i le paia o le ekalesia a Goodna auā na tofu le gogo ma si ana i‘a e ala i palapala a malo.
E to‘a 12 matafale o le aulotu. Peresetene: Auala Niko Mamea; Sui Peresetene: Malo Apolonio Purcell; Failautusi: Kisa Senio; Teutupe: Aano Iiga.
