Na logo mālie upu sa apoapoai faamalosi ai le susuga i le faafeagaiga ia Rev Peniamina Tuifaasisina, i le tomatauina o le olaga taumafai o le tamaitai o Ronderlynn Kilipati, i le faamanatuina o lona 21 tausaga.
O le Aso Lulu, aso 2 o Novema na atoa lelei i ai le 21 tausaga o le tamaitai o Ronderlynn, o le po foi lea na atofaina e faamanatuina ai, ae na soifua a‘e o ia i Fagaalu Amerika Samoa i le aso 2 o Novema 1990. Na momoli le ki e nai ona mātua ia Olepa ma si ona tamā, ma na la saunoa ai foi, faato‘ā mafai lava ona valavala pe afai ua foai e le Atua se A‘oa‘o e fai mona tofi ma tuua ai le latou mafutaga māfana. O le tamā ia Iliolemalae Apulu Asivao Kilipati e mai Satapuala, Faleasiu ma Fasitoouta, ae o le tina ia Olepa e mai Satapuala ma Satuimalufilufi.
O loo galue nei le tamaitai o Ronderlynn i le Kamupani a le Peabody Energy Australia (Account Payable officer). O se tamatai usitai ma faamaoni e pei ona molimauina e ona mātua i le tauaaoina o le ki o lona 21.
Matagofie le aso fiafia i le faatasi mai o ona aiga mai tuafāfine o si ona tamā mai Aukilani Niu Sila ma isi Setete o Ausetalia.
Manuia tele lou 21 tausaga Ronderlynn.
O alofaaga mai ou aiga uma sili mai ou mātua lou uso faapea si ou tuagane ma aiga uma lava i Samoa, Niu Sila, Amerika ma Ausetalia.
