Faamanatu 21 tausaga o Mary Tava‘e Foe

A aulia e se atalii poo se afafine ni tausaga se tele e pei o le 21 tausaga, e faatāua tele e aiga aemaise lava mātua lena aso, auā o le pine faamau lea o se tausiga alofa ma le saogalemu lelei na faia e mātua ma le aiga atoa, auā le ola tuputupu a‘e o lenei tofi mai le Atua.
O le ala lea e matuā tapena ai se faatasiga ma valaaulia aiga, o uo ma aumea mamae, ina ia sii faatasi le faafetai ma le viiga i le Atua, auā e moni lava o mātua ma le aiga sa faatinoa le tausiga faaletino, ae ana lē seanoa le faamalumalu mai o le puipuiga alofa o le Tamā faalelagi, semanu lava e faivavale galuega a le tagata.
O le aoauli o le Aso Toonai, 6 Iulai na potopoto ai le toatele o aiga, uo ma aumea mamae a le tamaitai o Mary Tava‘e Foe, ina ia latou faamanatu faatasi le aulia ai o le 21 o ona tausaga. O le aso fanau sa fai i le community hall i Avondale, ma o le susuga i le A‘oa‘o o le ekalesia AOG Samoa i Mt Wellington, susuga Fa‘ifa‘i Sione Lauina na saunia se upu mai le Tusi Paia mo le itu faaleagaga.
O mātua o Mary, o Tusipi ma Masi Tava‘e Foe, mai alalafaga o Tuanai ma Leauvaa o lona tamā, ma lona tina mai le afioaga o Malie. Sa auai foi tuaa o si ona tina, le fetalaiga ia Tauanuu Faasegi Pati ma le tausi ia Fipe mai Samoa, ma o lona tamā matua ia Tauanuu Faasegi na foaiina atu le Ki o le 21 o le tamaitai o Mary.
Peitai o se vaaiga mataina i lea aso, ona e lua Ki o le 21 o le Mary Tava‘e, e pei ona foaiina atu i ai le isi Ki e le tuafafine o lona tamā, o Auntie Elisapeta Unasa, e fai ai ma sui o tuaa poo grandparents o Mary, o mātua ia o lona tamā, ia Maligi ma Oli Tava‘e, ona o i laua tonu ia na tausia mai lava Mary i lona itiiti seia oo ina maliliu ona grandparents ma latou valavala ai. O lea la sa avea ai lona aunty ma sui o grandparents e tuuina atu le isi Ki e faailoga ai lona 21.
O le afioga ia Malagamalii Alefosio Nonumalo sa fai ma sui o le auvalaaulia ma aiga na lua, e molimolia se lauga faafetai i mātua o le tamaitai o Mary, e tusa ai ma le tapenaga matagofie o le aso fanau o le afafine.
E momoli atu ai foi faamanuiaga ma moomooga alofa mo le tamaitai ia Mary Tava‘e Foe, ina ua e aulia manuia le 21 o tausaga o lou olaga. O le tatalo tau ina ia tausi mai pea le Atua le Tamā ia te oe le afafine, ina ia tele nisi tausaga o lou soifua e toe faaopoopo, ma tatou ola fiafia ai pea, ma ia manuia uma laasaga o lou olaga i au aoaoga ma galuega o feagai ai.
Alofaaga mai ou uso ma tuagane, o ou mātua, mātua o ou mātua ma lou aiga atoa.