Faamanatu 21 tausaga o Christine Tofa Gago

(Onehunga, Ta‘elefaga Fagaloa & Lefagaoalii Safune)


“O le faamoemoe ua taunuu o le laau o le soifua lea…” Sa matuā faatumulia le nofoaga o le Manhattan Catering Services i Mt Roskill i le Aso Toonai na se‘i mavae nei e lē gata i le ‘aufaigaluega ma o latou faletua, ae o aiga foi ma uo a le tamaitai o Christine poo T e pei ona faaigoaina ai e le tele o ana uo mamae ma aiga.

O le tamaitai o T o le alo o le faafeagaiga ia Pastor Tuulalo Gago, Sui Taitai a le First Samoa Assembly of God i Niu Sila, ma le faletua ia Christina, o loo galulue nei i le ekalesia a le New Lynn – First Samoa Assembly of God. O le fetalaiga ia Leitualasā Sinapati sa fai ma fofoga o le aso auā le ma‘ave eseese o le auvalaaulia sa auai ai.

O se aso sa matuā mataina le felanulanuai o le teuga o le nofoaga sa faatino ai lenei faamoemoe, aemaise lava i le lanu meamata ma le lanu mūmū a le ‘au a le South Sydney Rabbitohs, le aulakapi liki e faananau i ai le lagolago a le tamaitai e ou lea faamoemoe.

Sa tapenaina foi i lea aso e le tamaitai ia T ni meaalofa mo nisi o le auvalaaulia sa ogatusa lanu o latou laei ma lanu feivariti o le theme o lona faamoemoe.  E le gata i lena a o le mataina ma le tofo lelei o le keke aso fanau e 21 ona lālā sa tapenaina lava i lanu na faaauga i ai lea aso.

Ua le gata foi i lea ae sa matuā faamalieina le maimoa a le auvalaaulia ona o le manaia o tapenaga ma fiafia sa alo atu i ai le autalavou a le First Samoa Assembly of God – New Lynn, auā la latou tamafanau, aemaise ai foi o le sausaunoaga faaiu a le susuga i le tamaitai fai aso fanau, a o lagiina ma pese faafiafia le susuga ia Mr Gago i le vii o Ta‘elefaga Fagaloa, ma taualugaina ai le faamanatuina o le 21 tausaga o le tamaitai ia Christine.

Saunoa foi le susuga ia Pastor Fereti Toleafoa, le susuga i le Teuoloa a le ekalesia First Samoa Assembly of God i Niu Sila, i upu timai aemaise o le tatalo faamanuia e tomatauina ai le soifua agai i luma o le tamaitai ia Christine. Alofaaga mai ou mātua, lou aiga atoa faapea uo aemaise lau ekalesia.