Faamanatu 20 tausaga o le South Seas Healthcare

O le tausaga e 1998 na talanoaina ai galuega faafomai e nisi o fomai Samoa e toaiva e aofia ai le susuga ia Dr Debbie Suitafa Ryan-Nicholson, Dr Teuila Percival, Tagaloa Dr Andrew Chan Mow, Dr Sirovai (Siro) Fuatai, Seiuli Dr Juliet Walker, Dr Florina Chan Mow, Aiono Dr Alex Ekeroma, Dr Sam Fuimaono ma Dr Tiso Faletoese, sa galulue o ni fomai i totonu o Niu Sila.

Ina ua maua mai talaaga mai le ofisa o le Health a Niu Sila e tele puapuaga o faama’i i tagata Pasefika, na iloa uma e fomai i lena vaitaimi le telē o le faaletonu o loo iai le soifua maloloina i tagata Pasefika ae lei maua mai ni faamaumauga mai le Matagaluega o le Soifua Maloloina (Ministry of Health).

O le toatele la o fomai Samoa nei e galulue uma i Aukilani, e alu lava le tagata ia e faigaluega i le nofoaga o loo galue ai ae sailiili lava taimi e fai ai se mafutaga e ala i se BBQ ma faasoa ai i le faafitauli lea ua tulai mai i tagata Pasefika. O le lagona na autasi iai nei tamafanau a Samoa ia tatau loa ona tatala se latou falemai auā o lea ua toatele ma’i, ma e manaomia foi se falemai e iai lava se pulega a tagata Pasefika aemaise lava ia Samoa.

Na talatalanoa i le mea e maua mai ai ni tupe, auā o le mea pito sili lea ona tāua. O le toatele o latou sa galulue i le ofisa o le Soifua Maloloina, o nisi sa galulue i le falemai ae sa sailiili lava fesootaiga ina ia mafai ona maua fesootaiga lelei mo latou poo ai e maua ai se seleni e tau amata ai le falemai.

O Fepuari i le tausaga 1999 na tatala aloaia ai loa le falemai o le South Seas Healthcare i Otara. O le mafuaga na filifili ai e nei fomai le nofoaga i Otara ona e pau lea o le vaega o South Auckland e leai se falemai Pasefika sa iai. Sa iai fomai i Magele, Manurewa o le itu i Sisifo o Aukilani o vaega uma ia sa iai fomai Samoa.

Ma le isi vaega i le sailiiliga a nei fomai Samoa, na pau lea o le nofoaga o loo toatele ai tagata Pasefika o loo aumau ai ae leai se falemai Pasefika o iai. Ia ona tatala loa lea o le falemai; o isi ua galulue e vaai ma’i, ae o isi vaega e o e saili mai tupe e atina’e ai le falemai. O le mea faatauvaa na amatamata mai ai le galuega auā na’o le fa potu sa amata ai le falemai.

O le agaga maualuga o nei fomai Samoa e tatau lava ona foai e fomai Pasefika le tautua ma le auaunaga faafomai i tagata Pasefika, auā o le mea tonu lea o loo manao ai tagata Pasefika, e fia talanoa mai i se Samoa e fia talanoa mai i se Tonga i le vaega lea o le gagana auā e faafaigata tele o tatou tagata i le gagana peretania.

E lei faigofie le tauamataina o le galuega auā sa tau suesue mai taimi o fomai e fai ai ni a latou tiute auā o loo iai foi a latou galuega o loo galulue ai, ae o le tagata e maua lona avanoa ona alu atu lea fai lana tiute i se aso se tasi. E iai foi taimi e aumai ai nisi o uo a nisi o fomai ma faatino le latou galuega alofa i totonu o le falemai.

E lei aloaiaina le tatalaina o le falemai i lena vaitaimi ona sa leai se paketi a le falemai sa iai, ae sa faailoa lava i tagata o le falemai lea ua tatala a fomai Samoa, ia ona faapena lava lea ona o atu isi tagata ma ta’u atu i o latou aiga o nisi ua molimau atu ia latou uo ma atili ai lava ona faatuputupulaia le tele o ma’i ua omai ma ua atili ai le faatuputeleina o le tautua ma le auaunaga faamāmā avega a le South Seas Healthcare.

O le auaunaga a fomai sa iai i lea vaitaimi sa galue lava i luga o le alofa, sa leai se vaavaai i se tupe pe maua se totogi pe leai, ae sa fai lava i le avanoa o le fomai e maua ma sau e fai lana tiute, ae a maua foi le tupe ua lelei ae a leai ia ona galue gūgū lava lea ma le talitonuga e faaatoa mai e le Atua lana galuega alofa o loo fai nei.

O le tau sa totogi e vaai ai ma’i, e $10 i le tagata matua ae free tamaiti aoga mai le pepe faatoa fanau seia oo lava ina iu le aoga, ma o le tau lava lea sa amata mai ai le auaunaga seia oo mai lava i le taimi nei o loo alualu ai lava e lei suia. I le tausaga muamua e 300 ma’i sa mafai ona resitalaina seia faasolosolo atu lava i le 800 ma’i ma ua amata lava ona tupu ma ola le galuega tala’i ma le galuega alofa i tagata a fomai. Ae o le mea sa fai e nei tagata o le upu taulogologo a ma’i i le isi ma’i, o ma’i i fomai ua tala’i atu iai le falemai Samoa lea ua tatala i Otara ma ua atili ai lava ona tupu tele le agai mai o tagata.

I le taimi nei ua telē le galuega a le South Seas Healthcare, ona ua mafai ona iai fomai, ua iai ma Social Workers, ua iai foi Nurses, faapea foi ma i latou o loo galulue i luma i le ofisa o loo taulai atu iai le mamalu o le atunuu ma tagata Pasefika auā le vaaia o le fomai. Ua iai foi i latou ua mafai ona galulue i tua i aiga, ekalesia ma faalapotopotoga ma aoga aemaise lava i aoga faataitai a tamaiti e faatalatalanoa ni manaoga poo ni mafuaaga e mafua ai ona tutupu mai ia i latou.

O nei galuega lelei ua mafai ona tutu faatasi ai le aufaigaluega atoa ma ua faamāmā avega ma tauau ai ina foia le tele o faafitauli i nisi o aiga ma faatupu ma’i ai aemaise lava i tagata matutua. Talu lava ona amata mai le tautua a le South Seas Healthcare, ua lē faapito manū ia tasi, pe faapito na’o Samoa ae o lea ua mafai ona maua uma ai auaunaga mo tagata Pasefika. O le auga lava o le tautua a lenei kamupani o le momoliina lea o le tala lelei i tagata lautele ina ia maua e latou le soifua maloloina lelei. Ae na saunoa le susuga i le alii fomai ia Tagaloa Dr Andrew Chan Mow e faapea, e lē o le fale ae o le anofale, o le uiga o lana saunoaga o galuega a fomai ma i latou uma o loo galulue i totonu o le falemai o le mea pito sili lea ona tāua ia te ia, aemaise ai o gasegase o loo mafai ona sulufai atu i le falemai o loo mafai ona tuu atoa iai le latou auaunaga ina ia mafai ona faamalieina tagata o le atunuu.

O le faaiuga o le vaiaso na patipatia ai loa e le aufaigaluega a le South Seas Healthcare le alofa ma le agalelei o le Atua i totonu o le latou auaunaga, i le faamanatuina lea o le 20 tausaga talu ona tautua i le atunuu. Ma o ni tausaga e tele nei tausaga ma ua faaalia ai foi galuega mamana ma galuega alofa a le Atua i nei alo ma tamafanau o Samoa na latou faavaeina mai lenei falemai ona o le vaai alofa ia Samoa ma ona tagata aemaise i tagata Pasefika.

O le po o le Aso Faraile sa fai ai le taumafataga e faapitoa lava i sui e toaiva na latou faavaeina mai lenei falemai faatasi ai ma o latou aiga, ae o le po o le Aso Toonai na tatala ai loa le avanoa i aiga o loo resitala i le falemai faapea uo ma nisi o le Palemene e pei o le afioga i le tamaitai Minisita, Hon Jenny Salesa ma le afioga i le alii Minisita, Hon Auptio Tofae Su’a William Sio. O le susuga ia Faanana Efeso Collins sa fai ma Fofoga o le po ae o le susuga i le a’oa’o ia Sunita Nua na fai ma ositaulaga e siitia le taulaga o viiga o le Atua ona o nei tausaga e tele ua aulia mai e le kamupani.