O le tasi lenei o mataupu na matuā vevela ai finauga o le faiga palota na faato‘ā mae‘a atu nei.
O le siitia lea o le tau o taumafa ma le ofo a le Tautua a tulai mai i le Malo o le a aveese loa le 5% o le lafoga o taumafa. E ui o lea, o le mae‘a ai o le palota a o lea ua faamautu nisi o siitaga i le tau o taumafa.
Na faamaonia mai e se fai faleoloa i Lefaga na agai atu e fai lana oka masani mo lona faleoloa i le Aso Gafua ua tuanai, ae faaali ane loa e le Wholesale a Ah Liki le siitaga ua iai le taga falaoamata ma le pusa fuamoa.
“Ua alu lenei vaiaso o fai finauga ma tagata faatau o lo matou nuu ona ua tuuaia a‘u i lo‘u lē faamaoni ua toe sii ai foi le tau o le tele o taumafa, ae e matuā leai ma sa‘u mea e mafai i ai auā o lea foi ua sii mai le tau i le wholesale,” o le faamatalaga lea a le Afioga Tuala Steve McFarland o Safaatoa i Lefaga.
Faaalia e Tuala o le siitaga ua iai nei ua faatau mai ai le taga falaoamata i le $100 tala Samoa i le taga.
O le falaoamata lea e faafefete (self-raising) ua $120 tala i le taga. O le tau o le pusa fuamoa ua sii mai i le $69 i le pusa i le $90 tala.
“E matuā faigata lava ona faamatala i le au faatau lea tulaga ae o lea ua faamamalu mai siitaga o taumafa”. Faaalia e Unasa Iulia o le Failautusi lea o le Komiti e feagai ma le faasoaga o tau o oloa, o le masina na tea nei na faalauiloa ma amata faamamalu ai le siitaga o nisi o tau o oloa aemaise taumafa mo Samoa.
O lana faamatalaga o le siitaga ua fai e Ah Liki sa tatau ona faia i le masina na tea nei, ae atonu na faatalitali lava le kamupani seia mae‘a le palota ona faato‘ā faatino lea ae ua tele isi faleoloa o oloa siiatoa ua leva ona faatino a latou siitaga.
Ta‘ua e Unasa, o lea foi e tatau ona faia i lenei masina se isi iloiloga o le tau o taumafa. “O le fuamoa e lē o lavea i lalo o le lisi o oloa e faasoa atu ia i matou le tau,” o le saunoaga lea a Unasa.
“O le fuamoa ma oloa poo fua o faatoaga o loo faatau i le maketi, e lē mafai ona pulea e le Komiti o latou tau auā o le tele o oloa poo fua nei o faaeleeleaga o loo tuu lava i le fai faatoaga i Samoa nei e fuafua e ia le tau.”
O oloa o loo oo i ai le faatonutonuga o o latou tau e le Komiti lenei, e aofia ai meaai o loo aumai mai i atunuu mamao. Faaalia e Unasa, o le siitaga poo le faapa‘ū o le tau o oloa e faia i le ta‘i fā masina taitasi, ma o ina e manino mai ai lava ituaiga taumafa ma oloa moomia i aso uma e le atunuu ua aafia i ni suiga.
“Ua ala nei ona tuai se isi iloiloga ona o lea e lei faamautu lelei mai se faigamalo fou. O le taimi e mae‘a ai lea tulaga ona mafai loa foi lea ona toe faatino galuega masani a le Malo auā le matauina o le tau o oloa”.
Sa finau le Kovana o le Faletupe Tutotonu, a fua atu i le tau o oloa o loo faatau i Samoa e matuā taugofie atu nai i lo oloa faapea o loo faatauina i Niu Sila atoa ai ma Fiti.
O se finauga na matuā teena e le alii faipule o le Tautua Samoa, o se faiaoga o le tamaoaiga, o Afualo Dr Wood Salele, lea na ia ta‘ua e taugata oloa i Samoa auā e lē tutusa totogi maua a tagata Samoa ma tagata Niu Sila ma Fiti. O le finauga a le Komiti e fuafuaina tau o oloa, o loo tele lava oloa oloo taumafai i latou e tuutuu ifo i lalo le tau, ae e matuā leai se mea e mafai pe afai e siisii pea le tau o le suauu mai i fafo.
O loo ua tālia nei foi la se feiloaiga ia Mati, ona toe tuu mai loa foi lea o se isi fesuiaiga i le tau o oloa aemaise lava i taumafa.
Mo Tuala ma lona faleoloa i Safaatoa – e lē talia lava e se toeaina poo se loomatua ituaiga faamatalaga ua folasia i nisi foi siitaga, ona pau lava le tulaga tāua o le saili fesoasoani ina ia mafai ai ona faatau le meaai o le aso.
A fai atu i ai o le oloa lenei e ala ona taugata ona e amata mai lava le fuafuaga o lona tau i le nofoaga na gaosi ai ma le aumaiga i Samoa i luga o vaa seia oo ina taunuu mai ma faaopoopo i ai isi tau o le uafu ma le feaveaiga, e lē talia lava e le atunuu.
“E mautinoa lava toeitiiti alu i luga le tau o le falaoa vela auā o lea ua faamautu mai le siitia o le tau o le tagata falaoamata”.
