Faamalosia tulafono o fuamoa ia Me

Ua vaaia i luga o televise lapataiga e faatatau i le tasi lenei o oloa faatau, le fuamoa. O le masina fou o Me lea ua faamautu mai e le Matagaluega o Atina‘e Pisinisi ma Leipa e faamalosia ai tulafono o loo siomia ai le faatauina o le oloa o le fuamoa.

Aisea ua ave ai lava e le Matagaluega le faatāua i lenei taumafa auā ua tele faasalalauga i luga o le ea ua faalauiloa ai lea taumafa aemaise o suiga ia ua faamalosia nei pe a aulia atu le masina o Me. Faaalia e se sui sinia o le Matagaluega e mafua lea tulaga ona o se tasi lenei o oloa e fai o le toatele o tagata Samoa latou te faaaogāina ae o loo ua vaaia lava foi le iai o faaletonu e tulai mai ai. “Ua iai faamasinoga ua faia i le va o le au faatau fuamoa ona o faatioga a le atunuu,” o se faaaliga lea a lea sui sinia.
O le isi mataupu ua ave ai e i latou o loo faatau mai le fuamoa i fafo i latou e faatau atu fuamoa i Samoa lava ia.

O isi faitioga ua aofia ai le mamalu o le atunuu o loo faaaogāina fuamoa ua o latou toe faafoi fuamoa mai i fafo poo totonu lava foi o le atunuu ae o isi faitioga e i le va o kamupani i Samoa poo faleoloa laiti lava foi ua ave e le atunuu i le Faamasinoga ona o le lē lelei o nei taumafa.

O fautuaga la ia ua tuu atu i luga o le ea ua toe faamanatu ai i le atunuu aemaise le au faatau oloa ma i latou o loo faatautaia ia atina‘e, tulafono fou e faamalosia i le masina o Me.

“O le tulafono lava ia o fuamoa ia e aumai i fafo, e tatau ona tuu aisa mai lava i le taimi e aumai ai seia oo mai i le faleoloa e tuu aisa ai foi. Faato‘ā aveese lava ma le pusa aisa pe afai ua ave e le tagata faatau,” o se faaaliga lea a Unasa Iulia Petelo, o le Matagaluega o Atina‘e Pisinisi ma Leipa. “E lē tatau i lalo o le tulafono ona iai se taimi a o lei faatauina e le tagata faatau lenei taumafa, e tuu ai i fafo o le pusa aisa.”

O le tele o fuamoa o loo faatau mai i fafo o loo aumai i Amerika faapea ai ma Niu Sila. O le tulafono fou foi lenei ua faataatia ai na o le tolu masina lava e tatau ona iai i totonu o le pusa aisa se taseni poo se pusa fuamoa ona tatau loa lea ona aveese e faalēaogāina. O le tulafono mo fuamoa o loo maua lava ma faatau mai i atina‘e i Samoa nei, ua faamamafa ai le tatau ona na o le lima lava aso e tuu ai i luga o le fata o faleoloa o nei oloa.

E sili atu loa i le lima aso ua tatau loa ona aveese ona e telē le afaina o le soifua maloloina e ono tulai mai ai. O le mafuaaga lea o le tele o le faaseā e faasaga lava i ai latou o loo faatautaia atina‘e o fuamoa i totonu o Samoa.

Na fesiligia le MCIL pe aisea ua tele ai lava ina aumai pea i fafo lenei taumafa. O le tali, e tusa pe e tolu lava kamupani o loo iai atina‘e lafumoa ma fuamoa i totonu o Samoa, e lē o taitai lava ona tofutofusia ai le manaoga o tagata. Ua tele faleaiga ua faaaogāina ai lenei taumafa, ua tele foi fale keke ma o le toatele lava o le atunuu ua faaaogāina lava i aiga lenei taumafa.

“E tusa e tolu lava kamupani ia e i totonu o Samoa ae e lē taitai lava ona lava fuamoa o loo maua i totonu o le atunuu mo le manaoga lea o loo iai a le atunuu”. Faaalia foi e Unasa Iulia le tāua o le lelei atoatoa o le oloa lenei pe a aumai i fafo ma a iai lava faaletonu e pei o le pe o le aisa e aumai ai i luga o vaa, o le pe o le aisa a le faatau oloa, o inā lava e tatau ona iloa ai le afaina o lenei oloa.

O le masina la o Me ua fautuaina ai le au faioloa, le au faatau fuamoa ma le tagata faatau ina ia mātau lelei lava suiga nei ma ia lipoti atu i le MCIL se isi faletonu e ono tulai mai i lenei oloa ua faalauiloa nei. “E lē na o fuamoa ua aofia i lalo o lenei faalauiloa, ae o se vaega lenei o le unai a le Matagaluega ina ia mautinoa e lelei atoatoa oloa e faatau i totonu o Samoa, e lē gata i taumafa ae faapea foi isi oloa o loo auina mai i fafo, ma gaosia i totonu o Samoa”.

O le fuamoa o se oloa e lē o lavea i lalo o le lisi o oloa e fua atu e le Matagaluega sona tau.