Ia mataala ia i latou e fia faatau atu nonogatupe, mokesi o fale, inisiua, kiwi saver, tupe teu faaagaga (investment), ma le tele o isi faamatalaga ma fautuaga e aafia ai tupe.
O lenei vaitaimi ua fai lava si televave o mea uma ma ona gasologa, ua lē gata i totonu o aiga ma faalapotopotoga ae faapea foi i totonu o galuega ma kamupani eseese. O loo saili ma tauva le tele o tagata ma kamupani ina ia toatele tagata e faaaogāina ma faatau a latou oloa, faaaogāina a latou auaunaga, ma ia faatupulaia manaoga e saga faaauau ai pea faatauga ma faatumauina ai tagata lautele, ina aua ne‘i toe suia manatu i nisi kamupani, ae ia taofi mau pea na o latou lava.
O le faatauvaga ona fai o gaioiga, ua soona nunumi atu ai ma faiga faatosina leaga ma le eleelea, e gaoi ma fao ese faamalosi ai tupe a tagata lautele, ae sili ai ona gaoia loto ma manatu o nisi ona o le tuinanau ma faiga taufaasese. O le talanoaina o le tulaga tau seleni, mo le faatuina o maota ma fale, ma le fautuaina o teugatupe faaputu mo le lumanai, aemaise o nonoga tupe ma inisiua, o se tasi o mailei e vave tele ona tosina, ma oso ai le moge o le toatele.
O le faafitauli, ua saoasaoa ai ma le faitau aofai o tagata ua matuā gaugau ai, ma leiloloa ai le faitau afe o seleni sa tatau ona faaaogā tatau. O le isi faafitauli matautia ua lē gata i le fuafuaina o polokalame ma oloa a kamupani e nafa ma ituaiga galuega faapea, ae sili ai le agavaa ma le soona faatautala o sui ma tagata faigaluega o loo faatinoina galuega. O nisi e matuā lē malamalama lava i tua atu o le oloa poo le auaunaga o loo faatau atu, ma fautuaina ai tagata lautele, ae matautia le fofoga ma le tele o upu i le faamatalaina o mea eseese.
O le ala lea ma le faapogai o le toe silasila toto‘a o le malo i ni auala e mafai ona faaitiitia ai le faafitauli o le leiloloa o tupe a tagata ma le mativa, ona o le pepelo ma le taufaavalea ma faiga piopio a nisi o kamupani ma tagata faigaluega, poo tagata taitoatasi foi (agent/broker/self-employee).
O le tino ua faaigoaina o le AFA (Authorized Financial Advisor) ua tofia e le malo latou te mataituina faiga taufaasese ma le soonafai o loo aafia ai tagata lautele o le atunuu. O le tulafono FAA (Finacial Advisers Act 2008), ua faamaonia ai suiga tetele e pei ona ua amata faamamaluina i le amataga o le masina nei Iulai 2011. O suiga tetele e pei ona faatulagaina, o le a vaai ma maitauina toto‘a mea taitasi uma ma gaioiga a kamupani ma tagata tuma‘oti, e le tino e pei ona ta‘ua, le AFA.
O suiga ma le manaoga o le tulafono, e faatatau tonu ia i latou o loo ave fautuaga i tagata ma o loo galulue i ia ituaiga galuega, ina ia mautinoa o sa‘o ma atoatoa ma malamalama lelei i le galuega o loo fai. A o le isi itu o le tulafono o loo faailoa ai le aiā tatau a tagata faatau, i latou o loo faaaogāina oloa ma auaunaga e aunoa ma se faapogisaina i ni faiga piopio.
O suiga fou a le FAA & AFA a Niu Sila
E tolu vaega ua vaevaeina i ai ituaiga tagata faigaluega faufautua mo galuega tau seleni.
Vaega muamua: Lesitala (RFA) Registered Financial Adviser
Ua faamalosia ona lesitalaina tagata uma e faatinoina galuega e pei o le faatauina o mokesi, inisiua (life insurance, risk insurance, call debt securities, bank term deposits, consumer credit contracts), atoa ai ma le tele o isi ituaiga inisiua. O latou foi ia e mafai ona fautuaina tagata lautele, ae lē mafai ona latou faia se faaiuga ma ave se faatagaga i soo se mataupu a aafia ai vaega e pei ona ta‘ua.
Vaega lua: Faatonuga (AFA) Authorised Financial Adviser
Ia na o i latou ia e fautuaina le tulaga tau teugatupe, e pei o le Kiwi Saver, o fuafuaga mo tupe ma ona puipuiga. O aseta ma meatotino atoa ma fanua ma konekarate faaagaga mo le lumanai (investment, kiwi saver, financial planning service, estate or land and future contracts). E tatau ia i latou ia, ona tausisi ma faatumauina i taiala pei ona aiaia ma faatonuina. Ina ia iai le poto ma agavaa, ia faaaloalo ma vaaia lelei tagata lautele, ia lautele ma lelei uiga faaalia, ma ia a‘oa‘oina i vaega uma e pei ona faatulagaina.
Vaega tolu: Ia faaauau pea ona galulue mo agavaa, ma e tatau ona taulimaina faamaoniga mai le komisi.
Soo se tasi lava e faafaigaluegaina e soo se kamupani i galuega mo le fautuaina o manaoga tau tupe, e tatau ona iai se tusi faataga, o se faamaoniga faaletulafono mai le komisi o puipuiga (commission of securities). Se‘i vaganā o se latou lava oloa ona lē āfaina lea ma manomia se faatagaga faapitoa. Ia mautinoa foi o le kamupani ma le tagata faigaluega ia tutusa ona iai agavaa e pei ona faamatalaina muamua, aemaise lava o le faamatuuina o fautuaga talafeagai.
O le komisi o puipuiga ua ia i latou le malosi latou te liliuina ai mataupu agai i le tulafono ma faatulagaina. O latou foi o le a faia se gaioiga ina ia saga faalauiloaina le tulafono ina ia malupuipuia vaega e lua, kamupani ma tagata lautele.
O le isi vaega o le tulafono o loo faasaga agai i kamupani uma, ma faalapotopotoga atoa ma tagata o loo ofoina fautuaga tau tupe, ina ia lesitalaina ma iai ni ofisa mautu, ma o loo faatulafonoina foi i lalo o aiaiga ma puipuiga uma.
E tatau foi ona lesitalaina ma avanoa faamatalaga uma i luga o le upega o fesootaiga, ina ia mafai ona maua e tagata lautele le avanoa e faitau ai ma silasila i lea kamupani ma lea auaunaga.
E amata i le aso muamua o Tesema o le tausaga nei lava, ona faamamalu le taliaina na o kamupani ma psinisi ua mae‘a ona lesitalaina faaletulafono ma ua faamaonia e talia aiaiga ma auala e pei ona faataatia. Ae mo tagata faatau ma tagata lautele, o le a na o i latou ua iai agavaa faapitoa e ao ina faalogo i ai ma faaaogāina fautuaga mo soo se mataupu tau tupe ma faaputuga tupe faapea ma inisiua (only Registered Financial Adviser, Authorised Financial Adviser & QFE).
O soo se tasi e afea lou maota, poo lou ofisa ma isi nofoaga ma fautuaina i soo se tulaga lava e pei ona ta‘ua i luga e aafia ai seleni, ua mafai ona fesiligia pe ua lesitala faaletulafono i suiga fou e pei ona iai.
E tatau foi ona ia taulimaina se faamaoniga ma faamaumauga e faamaonia ai, o se tagata ua agavaa ma ua faatagaina e faatau atu ma fautuaina manaoga e aafia ai tupe.
O se faiga ua matuā malupuipuia ai tagata lautele, ae sili ai ona puipuia le aufaigaluega ma kamupani mai le faia ma le lē faataunuuina o le mea moni e fesoasoani ai ma momoli le feau mo itu e lua.
O le faamoemoe o lea faiga fou, e manatu o le a fesoasoani tele ma foia ai le tele ma le anoanoai o le mau faafitauli o loo pagatia ai tagata o le atunuu.
